Rhaglen a chofnodion

Estynnodd y Cadeirydd groeso cynnes i bawb oedd yn bresennol a chyfeiriodd at absenoldeb y Cynghorwyr Peter Read a Trefor Lloyd Hughes oherwydd salwch. Estynnodd y Cadeirydd ei ddymuniadau gorau personol a dymuniadau ei gyd-Aelodau at y Cynghorydd Read a'r Cynghorydd Hughes am adferiad llwyr a buan.

Derbyn unrhyw ddatganiad o ddiddordeb gan unrhyw Aelod neu Swyddog parthed unrhyw eitem o fusnes.

Ni dderbyniwyd unrhyw ddatganiad o ddiddordeb.

Cyflwyno cofnodion cyfarfod blaenorol y Cyd-Bwyllgor AAA a gynhaliwyd ar 26 Mehefin, 2015.

Cyflwynwyd cofnodion cyfarfod diwethaf y Cydbwyllgor AAA a gynhaliwyd ar 26 Mehefin, 2015 a chadarnhawyd eu bod yn gywir.

Cyflwyno adroddiad ar weithgareddau’r Uned Ddarparu AAA yn ystod tymor yr Haf, 2015.

Cyflwynwyd adroddiad yr Uned Ddarparu ar gyfer Anghenion Addysgol Arbennig ar weithgareddau a gyflawnwyd yn ystod tymor yr haf, 2015 i’r Cyd-bwyllgor ei ystyried.

Amlygodd y Prif Seicolegydd Addysgol ddatblygiadau mewn perthynas â newidiadau staff yn y Gwasanaeth Gweinyddol, y Gwasanaeth Athrawon Arbenigol a’r Gwasanaeth Seicolegwyr Addysgol a lle'r oedd y newidiadau hynny’n golygu colli swyddi h.y. trwy ymddiswyddo, newid swydd neu gwblhau cyfnod secondiad. Esboniodd yr effaith bosib ar y gwasanaeth perthnasol a’r camau lliniaru a gymerwyd naill ai drwy gynnig i lenwi swydd wag neu drwy aildrefnu llwythi gwaith o fewn y cyflenwad staff cyfredol. Cyfeiriodd y swyddog at y pwyntiau canlynol -

•           Bydd dau o'r cynorthwywyr gweinyddol o fewn y Gwasanaeth Gweinyddol yn gadael y gwasanaeth, y naill oherwydd ymddeoliad (0.4 llawn amser) a'r llall (llawn amser) i swydd allanol. Er y gobeithir y gellir llenwi’r swydd llawn amser am gyfnod dros dro, y bwriad yw peidio â llenwi'r swydd 0.4 arall.

•           Mae'r Gwasanaeth Clyw yn parhau i weithredu ar sail tîm cryf gyda thri o athrawon cymwys, sy'n gyfwerth â 2.6 llawn amser, yn ogystal ag athro llawn amser sydd heb gymhwyso ac sy’n hyfforddi ar hyn o bryd. Er bod un o’r athrawon yn ymddeol adeg y Nadolig ac y bydd y gwasanaeth yn colli cynorthwy-ydd profiadol, bydd y gwasanaeth yn parhau i fod â thîm sy’n gyfwerth â 2.7 o athrawon llawn amser o’r Nadolig ymlaen.

•           Mae 2.1 o athrawon llawn amser cyfwerth ar hyn o bryd yn y Gwasanaeth Nam ar y Golwg ynghyd â dau gynorthwy-ydd cymwys (cyfwerth ag 1.6 llawn amser).

•           Bu gostyngiad yn y gwasanaeth ar gyfer iaith a chyfathrebu ac yn arbennig ar gyfer awtistiaeth. Mae dau athro o fewn y gwasanaeth ar hyn o bryd, cyfwerth ag 1.8 llawn amser. Mae'r gwasanaeth wedi colli dau athro (h.y. cyfwerth ag 1 llawn amser) ynghyd â chynorthwy-ydd profiadol a oedd ar secondiad o Wynedd. Mae'r tîm ar hyn o bryd yn ei chael yn heriol cwrdd â’r holl anghenion ar draws y ddau awdurdod.

•           Mae'r gwasanaeth ar gyfer anawsterau meddygol a chorfforol yn parhau i weithredu ar sail dau athro, un llawn amser a'r llall sy'n gweithio i’r gwasanaeth am 0.3 llawn amser ond sydd hefyd yn darparu 0.2 i'r gwasanaeth gweledol.

•           Mae'r Gwasanaeth Seicoleg Addysgol yn parhau i weithredu gyda llai o staff nag arfer gydag un uwch seicolegydd ar secondiad i Gyngor Gwynedd ar hyn o bryd.  Mae dau seicolegydd rhan-amser  wedi gadael y gwasanaeth sy’n golygu bod modd cefnogi dau seicolegydd dan hyfforddiant ar gwrs proffesiynol yng Nghaerdydd.  Mae'r gwasanaeth yn parhau i weithredu system lle mae seicolegydd wedi’i neilltuo ar gyfer ysgolion unigol ac mae nifer o sesiynau’n cael eu trefnu ar gyfer pob ysgol; mae'r gwasanaeth yn ceisio gwneud newidiadau i'r system hon er mwyn sicrhau bod yr holl ysgolion yn cael eu gwasanaethu’n deg. Mae cyfwerth â 5.9 o seicolegwyr llawn amser (10 o unigolion) o fewn y gwasanaeth ynghyd ag un hyfforddai profiadol sy'n gallu cymryd  ...  Gweld y Cofnodion llawn ar gyfer eitem 3.

Y Prif Seicolegydd Addysgol i roi cyflwyniad ar y Côd Drafft newydd. (Sylwadaeth ynghlwm)

(Fersiwn Saesneg o’r Côd ynghlwm)

Cyflwynwyd adroddiad y Prif Seicolegydd Addysg a oedd yn ymgorffori'r fersiwn ddrafft o’r Côd Anghenion Dysgu Ychwanegol i’w ystyried gan y Cyd-bwyllgor.

Dywedodd y Prif Seicolegydd Addysg fod y Côd drafft wedi cael ei gyhoeddi i gyd-fynd â’r Mesur Drafft Anghenion Dysgu Ychwanegol a’r Tribiwnlys Addysg (Cymru), sy'n destun ymgynghoriad tan 18 Rhagfyr, 2015 ac i helpu i lunio ymateb iddo. Mae'r Mesur yn cynnwys cynigion am system newydd o ddarparu ar gyfer plant a phobl ifanc sydd ag anghenion dysgu ychwanegol.  Aeth y Swyddog ymlaen i amlygu meysydd lle mae’r Côd drafft newydd yn wahanol i'r Côd Ymarfer cyfredol a'r goblygiadau tebygol i’r awdurdodau a’r Cyd-bwyllgor o ran amser ac adnoddau o ganlyniad i’r newidiadau a gynigir.

Nododd y Cyd-bwyllgor y pwyntiau canlynol -

•           Bod angen gwaith pellach ar y Côd drafft i'w ddatblygu i fod yn gôd ymarfer ac yn ganllaw ymarferol.

•           Bod gan y Côd drafft oblygiadau i’r holl asiantaethau sy'n cyfrannu tuag at gwrdd ag anghenion plant a phobl ifanc sydd ag anghenion dysgu ychwanegol, a bydd angen newidiadau o ran ymarfer.

•           Teimlir bod y Côd drafft yn benagored mewn sawl maes ac nad yw'n rhoi diffiniad digon penodol o anghenion dysgu ychwanegol.

•           Bod gan y Côd drafft oblygiadau sylweddol o ran y disgwyliadau ar ysgolion gan ei fod yn rhoi’r un lefel o hawliau cyfreithiol i blant ag anghenion dysgu ychwanegol ar ddau ben y continwwm p’un a yw’r anghenion hynny’n rhai ysgafn, cymedrol neu aciwt.

•           Fodd bynnag, mewn achosion lle mae'r ysgol o'r farn bod yr anghenion hynny y tu hwnt i'w gallu i gwrdd â nhw, gall gyfeirio'r mater at yr awdurdod lleol. Gan nad yw'r Côd yn darparu meini prawf penodol er mwyn penderfynu trothwy gallu, y perygl yw y bydd yn rhaid i awdurdodau ddatblygu eu meini prawf eu hunain gan arwain felly at amrywiadau cenedlaethol a allai fod yn fawr.

•           Bod cyfle wedi'i golli i sicrhau unffurfiaeth a chysondeb ar draws Cymru drwy ddatblygu un gyfres glir o feini prawf a fyddai'n berthnasol i bob un o'r 22 awdurdod lleol trwy’r wlad.

•           Bod y Prif Seicolegydd Addysgol wedi drafftio ymateb i'r Mesur drafft ar ran Gwynedd ac Ynys Môn.

Gofynnodd y Cyd-bwyllgor am gopi o ymateb y Prif Seicolegydd Addysgol i'r Mesur drafft, a bod  Aelodau'r Cyd-bwyllgor sy'n dymuno ychwanegu eu sylwadau eu hunain ar gynnwys y Mesur yn gwneud hynny drwy'r Cadeirydd a’r Is-gadeirydd fel bod yna hefyd ymateb ar ran y Cyd-bwyllgor ei hun.

Penderfynwyd nodi'r Côd drafft ar gyfer Anghenion Dysgu Ychwanegol a chrynodeb y Prif Seicolegydd Addysg o'r prif newidiadau.

CAM GWEITHREDU YN CODI: Bod y Prif Seicolegydd Addysg yn anfon copi o'r ymateb i'r Mesur drafft i Aelodau’r Cyd-bwyllgor.

Cyflwyno cyllideb y Cyd-Bwyllgor AAA am 2015/16.

Cyflwynwyd adroddiad Pennaeth Gwasanaeth Cyllid Cyngor Gwynedd a oedd yn cynnwys Cyllideb y Cyd-bwyllgor AAA ar gyfer 2015/16 i'w ystyried a'i gymeradwyo gan y Cyd-bwyllgor.

Adroddodd yr Uwch Gyfrifydd Addysg fod y gyllideb yn cynnwys darpariaeth ar gyfer y newidiadau arferol e.e. chwyddiant, cynnydd mewn cyfraniadau yswiriant gwladol ac ati, ond hefyd ostyngiad o 10% yn y cyfraniad gan Gyngor Sir Ynys Môn. Dyma'r tro cyntaf i doriadau cyllidebol beidio â chael eu gweithredu ar y ddwy ochr gan y ddwy sir sy'n golygu bod cyfraniad canrannol Gwynedd i'r Cyd-bwyllgor wedi cynyddu o 61.37% i 64.27% (£752,046) gyda chyfraniad Ynys Môn yn gostwng o 38.63% i 35.73%

(£464,637 i £418,174). Dywedodd y Swyddog fod angen i Ynys Môn adnabod toriad o 10% yn barhaol, sef £55,210 (11.9% mewn termau real) a bod angen i swyddogion o’r Cyd-bwyllgor a’r ddau awdurdod  gytuno ar y toriadau arfaethedig i'w cyflwyno i'r Cyd-bwyllgor.

Dywedodd Arweinydd Cyngor Sir Ynys Môn y byddai'n adrodd yn ôl i Bennaeth Dysgu’r Cyngor i sefydlu statws y trafodaethau o ran adnabod toriadau gwasanaeth sy'n gyfwerth â’r gostyngiad o £55k yn y cyfraniad a wneir gan Ynys Môn.

Penderfynwyd cymeradwyo a mabwysiadu'r gyllideb ar gyfer 2015/16 a gofyn i Swyddogion gyflwyno toriadau arfaethedig i'r cyfarfod nesaf.

DIM CAMAU GWEITHREDU YCHWANEGOL YN CODI

Cyflwyno adroddiad ynglyn â’r uchod.

Cyflwynwyd adroddiad Pennaeth Cyllid Cyngor Gwynedd a oedd yn ymgorffori adolygiad o gyfrifon y Cyd-bwyllgor am 2015/16 i'w ystyried gan y Cyd-bwyllgor.

Adroddodd yr Uwch Gyfrifydd Addysg fel a ganlyn -

•           Bod newidiadau hyd yma yn 2015/16 i sefydliad staffio’r Cyd-bwyllgor ar draws y Gwasanaeth Seicolegwyr Addysgol, y Gwasanaeth Athrawon Arbenigol a’r Gwasanaethau Gweinyddol yn golygu gorwariant net o £36k ar gostau staff yn 2015/16 o gymharu â'r gyllideb.

•           Bydd tua £9k o gostau hyfforddi’n cael eu hariannu o arbedion ar gyflogau Seicolegwyr Addysg yn unol â chynllun strategol i sicrhau seicolegwyr cymwys Cymraeg yn y dyfodol.

•           Bod cynnydd net o £17k yng nghostau rhent y Cyd-bwyllgor yn dilyn ail-leoli i Swyddfeydd Penrallt sy'n golygu bod angen adnabod arbedion parhaol i ariannu'r cynnydd hwn. Roedd costau ail-leoli unwaith ac am byth o tua £4k yn 2015/16.

•           Bod y Cyd-bwyllgor wedi tynhau gwariant ar adnoddau oherwydd y gorwariant a bod hynny wedi  arwain at gyfanswm arbedion net o £11k.

•           Oherwydd y sefyllfa staffio a diffyg capasiti i gynnal hyfforddiant, mae'r targed incwm a osodwyd yn afrealistig erbyn hyn. Mae'n debygol y bydd diffyg o £8k yn yr incwm eleni ac o’r herwydd mae angen adnabod arbedion parhaol i bontio'r bwlch hwn.

•           Bod yr ystyriaethau uchod yn arwain at orwariant o £65k yn 2015/16.

Dywedodd y Swyddog bod gan y Cyd-bwyllgor falansau cyfun o £150k ar ddiwedd blwyddyn ariannol 2014/5. Mae defnyddio £65k o’r balansau i gysoni'r gorwariant yn 2015/16 yn lleihau'r balansau i £85k ar 31 Mawrth, 2016.  Mae Cyngor Sir Ynys Môn wedi gweithredu toriad o 10% yn ei gyfraniad at gyllideb y Cyd-bwyllgor sy'n gadael diffyg o £55k mewn termau gwirioneddol ar gyfer y Cyd-bwyllgor i’w bontio’n barhaol. Mae angen adnabod darpariaeth wahaniaethol rhwng Gwynedd ac Ynys Môn i ddelio â'r toriad hwn. Awgrymodd y Swyddog hefyd eu bod o bosib wedi cyrraedd sefyllfa lle mae angen ystyried rhannu’r balansau rhwng Ynys Môn a Gwynedd i ganiatáu i’r ddau awdurdod benderfynu ar wahân sut y gellid defnyddio eu cyfran o’r balansau hynny.

Dywedodd y Swyddog wrth y Cyd-bwyllgor ei bod yn pryderu am sefyllfa ariannol y Cyd-bwyllgor wrth symud ymlaen i 2016/17 yn arbennig o ran yr ansicrwydd ynghylch y cyfeiriad a’r amserlen.

Penderfynwyd -

•           Derbyn yr adroddiad a chymeradwyo defnyddio £65k o'r balansau cyfun i ariannu'r gorwariant yn 2015/16.

•           Gofyn i Swyddogion symud yn gyflym i nodi’r gostyngiad yn y gwasanaethau ar gyfer Ynys Môn er mwyn nodi’r arbedion o £55k y mae eu hangen.

•           Rhagamcanu sefyllfa ariannol 2016/17 cyn gynted â phosibl a chymryd camau i ddatrys unrhyw broblemau ariannol.

•           Gofyn i Gynghorau Gwynedd a Môn am arweiniad ynghylch cyllideb 2016/17.

 DIM CAMAU PELLACH YN CODI

Derbyn diweddariad ar y sefyllfa mewn perthynas â gweithredu Strategaeth Cyngor Gwynedd ar gyfer Anghenion Dysgu Ychwanegol a Chynhwysiad.

Rhoddodd Uwch Reolwr Cynhwysiad Cyngor Gwynedd y wybodaeth ddiweddaraf i'r Cyd-bwyllgor ar lafar ynghylch bwrw ymlaen â'r Strategaeth yn dilyn adolygu’r ddarpariaeth a phrofiadau plant a phobl ifanc sydd ag anghenion dysgu ychwanegol yng Ngwynedd. Dywedodd fod bwriadau deddfwriaethol a phwysau ariannol wedi cyflymu’r amserlen weithredu. Bydd adroddiad ar y newidiadau arfaethedig i'r Gwasanaeth ADY a Chynhwysiad yn cael ei ystyried gan Bwyllgor Craffu Gwasanaethau Cyngor Gwynedd yr wythnos nesaf a chaiff yr adroddiad ei gyflwyno wedi hynny i’r Cabinet ei gymeradwyo ym mis Rhagfyr, 2015. Mae proses ymgynghori gynhwysfawr wedi’i chynnal gyda thua 400 o randdeiliaid ac mae’r adborth ohoni wedi cyfrannu at lunio Strategaeth ADY diwygiedig sy'n cynnwys rhai addasiadau o ran y model darparu ond mae ei egwyddorion sylfaenol yn aros yr un fath. Cadarnhaodd y Swyddog bod y Strategaeth ADY ddiwygiedig yn cynnig digomisiynu’r Cyd-bwyllgor AAA a symud i fodelau lleol o ddarpariaeth yn seiliedig ar ardaloedd Arfon, Dwyfor a Meirionnydd.

Gwnaeth y Cyd-bwyllgor y pwyntiau canlynol -

•           Y byddai wedi bod yn ddefnyddiol i'r Cyd-bwyllgor fod wedi cael yr adroddiad sydd i'w gyflwyno i Bwyllgor Craffu Gwasanaethau Cyngor Gwynedd i'w gynorthwyo i ddeall y sefyllfa a’r manylion ynghylch y cynigion ar gyfer newid sydd dan ystyriaeth gan Wynedd, a’i bod yn siomedig nad oedd ar gael i'r Aelodau yn y cyfarfod hwn.

•           Ei fod yn resyn nad oedd Aelodau'r Cyd-bwyllgor wedi cael eu hysbysu a'u cynnwys mewn trafodaethau ynglŷn â datblygu modelau darparu fel rhan o'r Strategaeth fel y cytunwyd y byddai'n digwydd yn y cyfarfod blaenorol.

•           Er bod Cynghorau Gwynedd ac Ynys Môn yn rhannu'r un weledigaeth o ran ceisio sicrhau’r profiadau a’r canlyniadau gorau i blant a phobl ifanc sydd ag anawsterau dysgu ychwanegol nododd y Cyd-bwyllgor fod strategaethau’r ddau gyngor ar gyfer cyflawni'r weledigaeth yn wahanol i raddau sydd bellach yn codi amheuaeth ynghylch dyfodol tymor hir y Cyd-bwyllgor.  Nodwyd hefyd bod angen egluro’r sefyllfa o safbwynt rôl Ynys Môn yn y bartneriaeth.

Penderfynwyd nodi'r sefyllfa a'r wybodaeth a gyflwynwyd.

DIM CAM GWEITHREDU YCHWANEGOL YN CODI

Dydd Gwener, 18 Mawrth, 2016 am 10:30 y.b. yn  Llangefni.

Nodwyd bod cyfarfod nesaf y Cyd-bwyllgor yn cael ei gynnal am 10:30 am ddydd Gwener 18 Mawrth, 2016 yn Llangefni.