Eitem Rhaglen

12.1  12C49P/DEL – Casita, Biwmares

12.2  33C190Q/VAR – Chwarel Bwlch Gwyn, Gaerwen

12.3  34LPA1033/CC – 6-29 Llawr y Dref, Llangefni

12.4  48C203 – 31 Maes Meurig, Gwalchmai

12.1 12C49P/DEL –Cais o dan Adran 73 i dynnu amod (09) (cyfyngu oedran y preswylydd) o ganiatâd cynllunio rhif 12C49M/VAR (codi 35 o fflatiau preswyl) yn Casita, Biwmares.

          Cyflwynwyd y cais i'r Pwyllgor Cynllunio a Gorchmynion ar gais Aelod Lleol.

Dywedodd y Prif Swyddog Cynllunio mai cais yw hwn i ddileu amod (09) o ganiatâd cynllunio 12C49M / VAR sy'n nodi mai dim ond pobl dros 55 oed y caniateir iddynt fyw yn yr unedau.  Gosodwyd yr amod yn wreiddiol am fod yr  ymgeiswyr yn arbenigo mewn darparu ar gyfer pobl dros 55 oed. Fodd bynnag, o ganlyniad i newidiadau yn y farchnad ac ansicrwydd ynghylch a fyddai’r  unedau yn cael eu prynu, byddai dileu'r amod yn caniatáu ar gyfer ystod ehangach o ddarpar brynwyr ac yn cynyddu tebygolrwydd y datblygiad. Mewn perthynas â thai fforddiadwy, cytunwyd ar gyfraniad o £100,000 yn y Cytundeb   Adran 106 blaenorol a osodwyd fel amod gyda chymeradwyo’r cais. Mae'r ddarpariaeth tai fforddiadwy yn cael ei thrafod ar hyn o bryd gyda'r ymgeisydd a chaiff y mater hwn ei gynnwys mewn cytundeb newydd. Dywedodd y Prif Swyddog Cynllunio hefyd fod angen cwblhau gwaith i sefydlogi’r ddaear cyn dechrau unrhyw waith arall fel yn y cais blaenorol, a bod yr amod hwn yn parhau i fod yn rhan o’r cais.

Dywedodd y Cynghorydd Lewis Davies, fel un o’r Aelodau Lleol, fod y cais o fewn Ardal o Harddwch Naturiol Eithriadol a bod y gwaith sefydlogi tir yn achos pryder i'r trigolion lleol ac i Gyngor Tref Biwmares. Roedd o'r farn y dylid cadw’r cyfyngiad oed. Cynigiodd y Cynghorydd Lewis Davies y dylid gwrthod y cais ac eiliodd y Cynghorydd T.V. Hughes y cynnig.

Cynigiodd y Cynghorydd Jeffrey M. Evans y dylid gohirio rhoi sylw i’r cais er mwyn caniatáu i'r Swyddog gael gwybod gan y datblygwr pam fo eisiau dileu'r amod cyfyngiad oed mewn perthynas â datblygu'r safle. Eiliodd y Cynghorydd Nicola Roberts y cynnig i ohirio rhoi sylw i’r cais.

Yn y bleidlais a ddilynodd, pleidleisiodd y Cynghorwyr Lewis Davies, Ann Griffith, John Griffith a T.V. Hughes i wrthod y cais yn groes i argymhelliad y Swyddog.  Pleidleisiodd y Cynghorwyr Jeffrey M. Evans, K.P. Hughes, W.T. Hughes a Nicola Roberts i ohirio ystyried y cais. Gwrthodwyd y cais ar  bleidlais fwrw'r Cadeirydd.

PENDERFYNWYD gwrthod y cais yn groes i argymhelliad y Swyddog ar y sail yr ystyriwyd nad yw’r cais yn bodloni anghenion yr ardal leol a bod angen datblygiad o’r fath ar gyfer pobl dros 55 oed.

(Yn unol â Chyfansoddiad y Cyngor, cafodd y cais ei ohirio’n awtomatig tan y cyfarfod nesaf er mwyn rhoi cyfle i Swyddogion baratoi adroddiad mewn perthynas â’r rhesymau a roddwyd am wrthod y cais).

12.2 33C190Q/VAR –Cais o dan Adran 73 i ddiwygio amod (03) o ganiatâd cynllunio cyf 33C190 (Adolygiad o amodau cynllunio yn unol á Deddf yr Amgylchedd 1995) er mwyn cael defnyddio’r fynedfa wreiddiol ar gyfer cerbydau i'r safle yn Chwarel Bwlch Gwyn, Gaerwen

Cyflwynwyd y cais i'r Pwyllgor Cynllunio a Gorchmynion ar gais Aelod Lleol.

Fel Aelod Lleol, cynigiodd y Cynghorydd T.V. Hughes y dylid ymweld â'r safle gan fod Cyngor Cymuned Llanfihangel Esceifiog wedi mynegi gwrthwynebiad i'r cais ar y sail bod y ffordd sy'n arwain at y fynedfa i'r chwarel yn anaddas. Maent hefyd wedi nodi y dylid cau’r fynedfa sy’n destun y cais hwn yn sgil amod sy'n gysylltiedig â'r caniatâd ar gyfer y fynedfa a ddefnyddir ar hyn o bryd. Eiliodd y Cynghorydd K.P. Hughes y cynnig.

PENDERFYNWYD ymweld â’r safle am y rhesymau a roddwyd.

12.3 34LPA1033/CC –Cais llawn ar gyfer gosod lifft platfform allanol ynghyd â gwaith cynnal a chadw ac ailfodelu yn 6 - 29 Llawr y Dref, Llangefni.

Cyflwynwyd y cais i'r Pwyllgor Cynllunio a Gorchmynion gan ei fod yn gais gan y Cyngor ac ar dir y Cyngor.

Cynigiodd y Cynghorydd Lewis Davies fod y cais yn cael ei ganiatáu ac eiliodd y Cynghorydd Nicola Roberts.

PENDERFYNWYD cymeradwyo’r cais yn unol ag argymhelliad y Swyddog gyda’r amodau a nodwyd yn yr adroddiad ysgrifenedig.

12.4 48C203 – Cais ôl-weithredol ar gyfer addasu ac ehangu yn 31 Maes Meurig, Gwalchmai

Cyflwynwyd y cais i'r Pwyllgor Cynllunio a Gorchmynion gan fod sylfeini’r estyniadau yn ffinio â thir sy'n eiddo i'r Cyngor ac y cyflwynwyd rhybudd arno.

Cynigiodd y Cynghorydd K.P. Hughes fod y cais yn cael ei ganiatáu ac eiliodd y Cynghorydd Nicola Roberts. 

PENDERFYNWYD cymeradwyo’r cais yn unol ag argymhelliad y Swyddog gyda’r amodau a nodwyd yn yr adroddiad ysgrifenedig.