Penderfyniadau

Penderfynwyd cymeradwyo cofnodion cyfarfod blaenorol y Pwyllgor Gwaith a gynhaliwyd ar 20 Mai, 2019 fel rhai cywir.

Penderfynwyd derbyn adroddiad y Cerdyn Sgorio ar gyfer Chwarter 4 2018/19, nodi’r meysydd y mae’r Uwch Dîm Rheoli yn eu rheoli er mwyn sicrhau gwelliannau i’r dyfodol ac i dderbyn y mesurau lliniaru mewn perthynas â’r meysydd hynny a nodir yn yr adroddiad.

Penderfynwyd cadarnhau bod y Pwyllgor Gwaith yn fodlon â chyflymder y cynnydd a’r gwelliannau hyd yma o fewn y Gwasanaethau Plant a Theuluoedd.

Penderfynwyd cadarnhau’r cynnig i ostwng oed mynediad yn Ysgol Henblas, i fod yn weithredol o 31 Awst, 2019.

Penderfynwyd cadarnhau Blaen Raglen Waith y Pwyllgor Gwaith wedi ei diweddaru am y cyfnod Gorffennaf, 2019 i Chwefror, 2020 fel y’i cyflwynwyd.

Penderfynwyd nodi’r sefyllfa a amlinellir mewn perthynas â pherfformiad ariannol y Cyfrif Refeniw Tai (CRT) ar gyfer blwyddyn ariannol 2018/19.

Penderfynwyd cymeradwyo’r Polisi Corfforaethol ar Adennill Dyledion fel y’i cyflwynwyd.

Penderfynwyd –

•           Nodi sefyllfa alldro ddrafft y Rhaglen Gyfalaf ar gyfer 2018/19 sy’n destun Archwiliad.

•           Cymeradwyo cario £3.065m drosodd i 2019/20 ar gyfer y tanwariant ar y rhaglen oherwydd llithriad. Bydd y cyllid ar gyfer hyn hefyd yn cario drosodd i 2019/20 yn unol â pharagraff 4.2, Atodiad A. 

Penderfynwyd –

•                       Nodi’r sefyllfa a amlinellir yn atodiadau A a B yr adroddiad yng nghyswllt perfformiad ariannol yr Awdurdod hyd yma a’r alldro disgwyliedig ar gyfer 2018/19.

•                       Nodi’r crynodeb o’r cyllidebau Wrth Gefn ar gyfer 2018/19 fel y manylir arnynt yn Atodiad C.

•                       Nodi’r sefyllfa mewn perthynas â’r Rhaglen Buddsoddi i Arbed a amlinellir yn Atodiad CH.

•                       Nodi’r sefyllfa o ran arbedion effeithiolrwydd ar gyfer 2018/19 yn Atodiad D.

•                       Nodi’r modd y caiff costau staff asiantaeth ac ymgynghorwyr eu monitro yn 2018/19 yn Atodiadau DD ac E.

•                       Nodi bod yr alldro yr adroddir arno yn y ddogfen yn parhau i fod yn amodol hyd oni fydd yr archwiliad statudol wedi’i gwblhau.

Penderfynwyd –

•           Rhoi’r hawl i Swyddogion drwy law’r Aelod Portffolio Busnes Corfforaethol i ymgymryd â’r dasg o orffen y cynllun drafft ac argymell i’r Cyngor Llawn fabwysiadu’r Ddogfen Gyflawni Flynyddol ar gyfer 2019/20 yn ei gyfarfod ar 15 Gorffennaf, 2019.

•           Bod y Pwyllgor Gwaith yn cadarnhau pa mor ymarferol ydyw cyflawni’r ddogfen hon fel cynllun sydd yn nodi gwaith y Cyngor wedi’i alinio â blaenoriaethau Cynllun y Cyngor ar gyfer ei gyflawni yn ystod 2018/19.

•           Bod y Ddogfen Gyflawni Flynyddol yn cael ei chyhoeddi yn gynharach yn y flwyddyn ariannol yn y dyfodol.

Cyflwynwyd a chadarnhawyd cofnodion y cyfarfodydd a ganlyn o’r Pwyllgor Cynllunio a Gorchmynion:-

·         1 Mai, 2019

·    14 Mai, 2019 (Ethol Cadeirydd ac Is-gadeirydd)