Rhaglen a chofnodion

Derbyn unrhyw ddatganiad o ddidordeb gan unrhyw Aelod neu Swyddog parthed unrhyw eitem o fusnes.

Cafwyd datganiadau o ddiddordeb gan :-

Mr. Alwyn Rowlands – datganiad o ddiddordeb a oedd yn rhagfarnu mewn perthynas ag Eitem 4 – Ceisiadau am Grantiau Mawr 2017/18 – Cais gan Ganolfan Hamdden Biwmares a’r cylch ac ni chymerodd unrhyw ran yn y drafodaeth na’r bleidlais ar yr eitem.

Cadeirydd Ymddiriedolaeth Elusennol Ynys Môn - datganiad o ddiddordeb a oedd yn rhagfarnu mewn perthynas ag Eitem 4 – Ceisiadau am Grantiau Mawr 2017/18   – Cais gan Gwmni Tref Llangefni ac ni chymerodd unrhyw ran yn y drafodaeth na’r bleidlais ar yr eitem.

Is-Gadeirydd Ymddiriedolaeth Elusennol Ynys Môn - datganiad o ddiddordeb a oedd yn rhagfarnu mewn perthynas ag Eitem 4 – Ceisiadau am Grantiau Mawr 2017/18  – Cais gan Gyngor Tref Caergybi ac ni chymerodd unrhyw ran yn y drafodaeth na’r bleidlais ar yr eitem.

Cyflwyno cofnodion y cyfarfod a gafwyd ar 10 Chwefror, 2017.

Cadarnhawyd cofnodion y cyfarfod a gynhaliwyd ar 10 Chwefror, 2017.

Ystyried mabwysiadu’r canlynol :- 

“O dan Adran 100(A)(4) o Ddeddf Llywodraeth Leol 1972, cau allan y wasg a’r cyhoedd o’r cyfarfod yn ystod y drafodaeth ar yr eitem a ganlyn oherwydd gallai olygu datgelu gwybodaeth eithriedig fel y’i diffinnir ym Mharagraff 12, Rhan 1 o Atodlen 12A i’r Ddeddf honno a’r Prawf Budd y Cyhoedd sydd ynghlwm.”

PENDERFYNWYD mabwysiadu’r canlynol :-

“Dan Adran 100(A)(4) Deddf Llywodraeth Leol 1972, cau allan y wasg a’r cyhoedd o’r cyfarfod yn ystod y drafodaeth oherwydd y tebygrwydd y câi gwybodaeth ei rhyddhau a honno’n wybodaeth y gwneir eithriad ohoni yn Atodlen 12A y Ddeddf ac yn y Prawf Budd y Cyhoedd a oedd ynghlwm.”

Rhoddi ystyriaeth i’r ceisiadau ar y rhestr fer ar gyfer grantiau mawr 2017/18.

Cyflwynwyd – adroddiad gan y Trysorydd mewn perthynas â’r uchod.

Dywedodd y Trysorydd bod 31 o geisiadau wedi dod i law a’u trafod gan y Pwyllgor hwn yn ei gyfarfod ar 10 Chwefror, 2017.  Penderfynodd y Pwyllgor roi 12 o’r ceisiadau ar restr fer ar gyfer eu hasesu’n fanylach. O ran yr 19 cais arall, ystyriwyd bod 9 yn addas fel ceisiadau ar gyfer grantiau Hamdden a Chymunedol (hyd at  £8,000) a bod yr ymgeiswyr wedi cael gwybod y bydd eu ceisiadau’n cael eu trosglwyddo i’r broses honno. Ni chafodd y 10 cais arall eu cefnogi ac mae’r ymgeiswyr wedi cael gwybod am benderfyniad y Pwyllgor.  

Cafwyd trafodaeth fanwl mewn perthynas â’r 12 cais a oedd ar y rhestr fer a PHENDERFYNWYD argymell i’r Ymddiriedolaeth Elusennol lawn yn y cyfarfod nesaf :-

·           Bod y 12 cais am grant a oedd ar y rhestr fer yn cael eu cefnogi;

·           Bod y Trysorydd yn cyflwyno adroddiad i’r Ymddiriedolaeth Elusennol lawn gyda’r symiau a argymhellwyd ac a gytunwyd gan y Pwyllgor Adfywio.