Rhaglen a chofnodion

Ethol Is-Gadeirydd.

Etholwyd y Cynghorydd Richard Owain Jones yn Is-gadeirydd y Pwyllgor hwn.

Derbyn unrhyw ddatganiad o ddiddordeb gan unrhyw Aelod neu Swyddog mewn perthynas ag unrhyw eitem o fusnes.

Dim.

Cyflwyno, i’w cadarnhau, gofnodion y cyfarfod a gafwyd ar 30 Ionawr, 2014.

 Cadarnhawyd cofnodion y cyfarfod a gynhaliwyd ar 30 Ionawr 2014 fel rhai cywir.

Cyflwyno adroddiad gan y Pennaeth Dros Dro – Gwasanaethau Democrataidd mewn perthynas â’r uchod.

Cyflwynwyd – adroddiad gan Bennaeth Dros Dro y Gwasanaethau Democrataidd mewn perthynas â’r cynnydd wnaed o ran cwrdd â gofynion Siarter CLlLC ar gyfer Cefnogi a Datblygu Aelodau.

Rhoes Pennaeth Dros Dro y Gwasanaethau Democrataidd ddiweddariad ar y modd y mae’r Cyngor wedi cwrdd â’r gofynion ac wedi derbyn y Siarter Safonol. Cyflwynwyd plac a thystysgrif i’r Cyngor ar 6 Mawrth 2014 gan Mr Daniel Hurford, Pennaeth Polisi (Gwella a Llywodraethu), CLlLC.

Nododd fod y statws wedi cael ei ganiatáu am gyfnod o 3 blynedd ac roedd hyn yn rhan o raglen waith y Pwyllgor.

Eglurodd Pennaeth Dros Dro y Gwasanaethau Democrataidd y gall y Cyngor, yn ychwanegol at y Siarter Safonol, weithio hefyd tuag at gwrdd â Siarter Lefel Uwch CLlLC, sef dyfarniad sydd newydd gael ei ddatblygu gan CLlLC.

PENDERFYNWYD nodi cynnwys yr adroddiad.

Cyflwyno adroddiad cynnydd gan y Pennaeth Gwasanaeth Dros Dro – Gwasanaethau Democrataidd mewn perthynas â’r uchod.

Cyflwynwyd – Adroddiad cynnydd gan Bennaeth Dros Dro y Gwasanaethau Democrataidd ar yr uchod.

Dywedodd Pennaeth Dros Dro y Gwasanaethau Democrataidd - yn dilyn yr adroddiad i’r Pwyllgor Gwaith ar 17 Chwefror mewn perthynas â’r ymarfer caffael, bu’n rhaid ail-raglennu gweddarlledu cyfarfodydd. Bydd yr offer yn cael ei osod yn Siambr y Cyngor erbyn diwedd mis Ebrill. Yn dilyn proses dendro gystadleuol, dyfarnwyd y contract i Public-i. Bydd hyfforddiant ar gyfer Aelodau a’r staff ar system weddarlledu Public-i yn cychwyn ym mis Mai a bydd y system yn hollol weithredol erbyn Mehefin 2014 gan gychwyn gyda’r cyfarfod o’r Pwyllgor Gwaith ar 9 Mehefin 2014.

Mewn perthynas â mynychu o bell, disgwylir canllawiau gan Lywodraeth Cymru. Bydd y Swyddog Monitro yn cyflwyno adroddiad i’r Pwyllgor Gwaith yn y man.

PENDERFYNWYD nodi cynnwys yr adroddiad.

Cyflwyno adroddiad gan y Pennaeth Gwasanaethau Democrataidd Dros Dro mewn perthynas â'r uchod.

Cyflwynwyd - Adroddiad gan Bennaeth Dros Dro y Gwasanaethau Democrataidd yn dweud fod Llywodraeth Cymru wedi clustnodi arian i Gynghorau Sir i gynnig grant o hyd at £500 i bob Cyngor Tref a Chymuned, gan gynnwys y rheiny sydd eisoes â gwefan, i’w wario ar ddatblygu gwefannau.

Nodwyd bod y grant yn un i gynorthwyo Cynghorau Tref a Chymuned i baratoi ar gyfer Deddf Llywodraeth Leol (Democratiaeth) (Cymru) 2013, sy’n cynnwys darpariaethau i gynghorau cymuned gyhoeddi gwybodaeth ar wefan. Yn wreiddiol, cyhoeddodd Llywodraeth Cymru ganllawiau’n dweud fod angen defnyddio’r arian erbyn diwedd Mawrth 2014. Mae’r cyfnod hwn bellach wedi’i ymestyn i 2014/15.

Nodwyd bod y Cyngor yn ymgynghori gydag Un Llais Cymru i sicrhau fod Cynghorau Tref a Chymuned yn defnyddio’r arian sydd wedi cael ei glustnodi.

Awgrymodd y Cadeirydd y dylid diweddaru Clercod y Cynghorau Tref a Chymuned a’u hatgoffa am yr arian grant sydd ar gael.

PENDERFYNWYD nodi’r sefyllfa gyfredol.

Cyflwyno adroddiad gan y Pennaeth Gwasanaethau Democrataidd Dros Dro mewn perthynas â'r uchod.

Cyflwynodd Pennaeth Dros Dro y Gwasanaethau Democrataidd adroddiad i’r Pwyllgor hwn ar 4 Chwefror 2013 ac ar 2 Gorffennaf 2013 ynghylch Adran 5 Mesur Llywodraeth Leol (Cymru) 2011 a’r angen i sicrhau fod trefniadau wedi eu gwneud i ganiatáu i Aelodau baratoi Adroddiad Blynyddol ar eu gwaith.

Nodwyd y gofynnwyd am adroddiadau drafft erbyn 9 Ebrill 2014 gan yr Aelodau gyda golwg ar eu cyhoeddi ar wefan y Cyngor ym mis Mehefin 2014.

PENDERFYNWYD nodi’r sefyllfa gyfredol fel y caiff ei hamlinellu yn yr adroddiad.

Cyflwyno adroddiad llafar gan y Uwch Swyddog Datblygu Adnoddau Dynol mewn perthynas â’r uchod.

Rhoes yr Uwch Swyddog Datblygu Adnoddau Dynol adroddiad llafar mewn perthynas â’r Cynllun Datblygu Aelodau a’r Adolygiadau Datblygiad Personol.

O ran yr Adolygiadau Datblygiad Personol, dywedodd y Swyddog ei bod yn asesu atborth o’r adolygiadau a wnaed a’r angen i ymgynghori gydag Arweinyddion Grwpiau yn y man.

Byddai adroddiad ar Gynllun Datblygu 2014/15 yn cael ei gyflwyno i’r Cyngor yn y man.

PENDERFYNWYD derbyn yr adroddiad.

Cyflwyno adroddiad gan y Pennaeth Gwasanaethau Democrataidd Dros Dro mewn perthynas â'r uchod.

Cyflwynwyd – adroddiad gan Bennaeth Dros Dro y Gwasanaethau Democrataidd yn dweud mai swyddogaeth y Pwyllgor hwn yn unol â Mesur Llywodraeth Leol (Cymru) 2011, yw adolygu digonolrwydd y ddarpariaeth yn yr awdurdod o ran staff, llety ac adnoddau eraill fel y gellir cyflawni dyletswyddau a swyddogaethau'r gwasanaethau democrataidd.

Bydd adroddiad ar waith y Pwyllgor yn ystod 2013/14 yn cael ei gyflwyno i’r Cyngor ar 8 Mai 2014.

Wrth ddatblygu rhaglen waith y Pwyllgor ar gyfer 2014/15, argymhellir y dylid canolbwyntio ar y meysydd isod:

• Cynllun Datblygu a Hyfforddi Aelodau gan gynnwys Adolygiadau Datblygiad Personol;

• Gweddarlledu cyfarfodydd a mynychu o bell;

• Mesur Llywodraeth Leol (Cymru) 2011;

• Adroddiad Blynyddol y Panel Annibynnol ar Gydnabyddiaeth Ariannol;

• Moderneiddio arferion gweithio;

• Y gyllideb ar gyfer 2015/16 a’i heffaith ar y Gwasanaethau Democrataidd.

Yn ystod chwarter cyntaf 2014/15, cynigir trefnu grŵp ffocws ar gyfer Aelodau er mwyn cael atborth yr Aelodau ar arferion gweithio a’r rhaglen waith ar gyfer y Pwyllgor hwn.

PENDERFYNWYD derbyn yr adroddiad a nodi y bydd y rhaglen waith yn cael ei diweddaru yn y cyfarfod nesaf.