Rhaglen a chofnodion

Ethol Cadeirydd ar gyfer y Pwyllgor Penodiadau.

Cafodd y Cynghorydd Gary Pritchard ei ethol yn Gadeirydd y Pwyllgor Penodiadau.

Ethol Is-gadeirydd ar gyfer y Pwyllgor Penodiadau.

Cafodd y Cynghorydd Ieuan Williams ei ethol yn Is-gadeirydd y Pwyllgor Penodiadau.

Fel a nodir uchod.

Derbyn unrhyw ddatganiad o ddiddordeb gan unrhyw Aelod neu Swyddog parthed unrhyw eitem o fusnes.

Ni dderbyniwyd yr un datganiad o ddiddordeb.

Cyflwyno, i’w cadarnhau, gofnodion y cyfarfod blaenorol a gynhaliwyd ar 22 Ionawr, 2025.

Cadarnhawyd bod cofnodion y cyfarfod blaenorol a gynhaliwyd ar 22 Ionawr 2025 yn gywir.

Ystyried mabwysiadu’r canlynol:-

“Dan Adran 100(A)(4) Deddf Llywodraeth Leol 1972, mae modd cau allan y wasg a’r cyhoedd o’r cyfarfod yn ystod y drafodaeth ar yr eitem ganlynol, oherwydd y posibilrwydd y caiff gwybodaeth ei rhyddhau a honno’n wybodaeth y gwna Atodlen 12A y Ddeddf a’r Prawf Budd y Cyhoedd eithriad ohoni.”

PENDERFYNWYD mabwysiadu’r canlynol:-

“O dan Adran 100 (A) (4) Deddf Llywodraeth Leol 1972, cau allan y wasg a’r cyhoedd o’r cyfarfod yn ystod y drafodaeth ar yr eitem a ganlyn oherwydd y tebygolrwydd y caiff gwybodaeth ei rhyddhau a honno’n wybodaeth y gwneir eithriad ohoni yn Atodlen 12A y Ddeddf honno ac yn y Prawf Budd y Cyhoedd sydd ynghlwm.”

Cyflwyno adroddiad gan y Prif Weithredwr.

Cyflwynwyd adroddiad y Prif Weithredwr i’r Pwyllgor ei ystyried.

Dywedodd y Cadeirydd fod y Pennaeth Proffesiwn (Adnoddau Dynol) a Thrawsnewid wedi ymddiswyddo ac y byddai’n gadael yr Awdurdod ddiwedd 2025.  Mae cwmpas y swydd bresennol yn eang mewn perthynas â chyfeiriad strategol nifer o swyddogaethau allweddol o fewn y Cyngor, gan gynnwys Adnoddau Dynol, Technoleg Gwybodaeth, Trawsnewid, Perfformiad a Chynllunio Corfforaethol, Cyfathrebu a Chyswllt Môn, sef prif ganolfan gyswllt y Cyngor. Ar ôl ystyried nifer o wahanol opsiynau ar gyfer llenwi’r swydd, cynigiwyd bod dwy swydd Pennaeth Gwasanaeth yn cael eu creu er mwyn rhannu’r cyfrifoldebau presennol, sef :-

·         Pennaeth Adnoddau Dynol, Cyfathrebu a Phrofiad Cwsmer

·         Pennaeth Digidol, Perfformiad a Moderneiddio

PENDERFYNWYD :-

·     Hysbysebu’r ddwy swydd yn allanol am gyfnod o 3 wythnos, yn amodol ar gadarnhau bod arian ar gael ar gyfer y ddwy swydd;

·     Bod teitl y swydd Pennaeth Adnoddau Dynol, Cyfathrebu a Gwasanaeth Cwsmer yn cael ei newid i Pennaeth Adnoddau Dynol, Cyfathrebu a Phrofiad Cwsmer;

·     Bod proses safonol y Cyngor yn cael ei dilyn ar gyfer y broses statudol o arfarnu gwahanol nodweddion ymgeiswyr am uwch swyddi sydd yn gyson a pherthnasol i’r hysbyseb allanol, fel y nodir yn yr adroddiad;

·     Bod rhaid i unigolion a gynhwysir ar y rhestr fer gyrraedd y trothwy ar gyfer pob elfen o’r broses recriwtio cyn mynd ymlaen am gyfweliad terfynol gan y Pwyllgor Penodiadau.