Rhaglen a chofnodion

Rhoddodd y Cadeirydd groeso i bawb oedd yn bresennol i’r cyfarfod hwn o’r Pwyllgor Archwilio ac estynnodd groeso arbennig i Miss Clare Williams i’w chyfarfod cyntaf o’r Pwyllgor Archwilio ers ei phenodiad yn Bennaeth Swyddogaeth (Adnoddau).

Derbyn unrhyw ddatganiad o ddiddordeb gan unrhyw aelod neu swyddog parthed unrhyw eitem o fusnes.

Ni dderbyniwyd unrhyw ddatganiad o ddiddordeb.

Cyflwyno cofnodion cyfarfod blaenorol y Pwyllgor Archwilio a gynhaliwyd ar 12 Rhagfyr, 2012.

Cyflwynwyd a chadarnhawyd fel rhai cywir gofnodion y cyfarfod blaenorol o’r Pwyllgor Archwilio a gynhaliwyd ar 12 Rhagfyr, 2012.

Materion yn codi –

·         Mewn ymateb i gwestiwn gan Aelod, dywedodd y Pennaeth Gwasanaeth (Cyllid) wrth y Pwyllgor - oherwydd cyfyngiadau amser yn y cyfarfod o’r Ymddiriedolaeth Elusennol Ynys Môn a gynhaliwyd ar 24 Ionawr, roedd adroddiad y Pennaeth Gwasanaeth (Hamdden a Diwylliant) yn ymwneud a chyrhaeddiad a pherfformiad Oriel Ynys Môn yn 2011/12 wedi ei gyfeirio i is-bwyllgor o’r Ymddiriedolaeth Elusennol ar gyfer ystyriaeth a sgriwtini pellach.

·         Mewn ymateb i gwestiwn gan Aelod, cadarnhaodd yr Uwch Ymgynghorydd Cyllid bod gwaith ynglŷn â’r Uned Cynnal a Chadw Adeiladau (BMU), yn parhau a bod y Pennaeth Gwasanaeth Tai mewn trafodaethau ynglŷn â moderneiddio’r Uned.  Mae’r Pwyllgor Archwilio wedi derbyn adroddiadau mewn perthynas â’r Uned Gynnal a Chadw yn dilyn adolygiad gan Swyddfa Archwilio Cymru o drefniadau darparu gwasanaeth yr Uned, a hefyd yn dilyn adolygiad archwilio mewnol o drefniadau caffael yr Uned.  Mae Archwilio Mewnol yn gwneud gwaith pellach a dargedwyd mewn perthynas â’r mater hwn.

CAMAU GWEITHREDU YN CODI: Gofyn i’r Pennaeth Gwasanaeth Tai adrodd yn ôl i’r Pwyllgor yn ei gyfarfod nesaf ar y cynnydd gyda mynd i’r afael â materion llywodraethu yng nghyswllt yr uned Cynnal a Chadw Adeiladau.

·         Gyda chaniatâd y Pwyllgor, cyflwynwyd Cynllun Gweithredu Llywodraethu/Rheoli Gwybodaeth er ystyriaeth gychwynnol yr Aelodau yn unol â phenderfyniad y Pwyllgor yn ei gyfarfod blaenorol ei fod yn derbyn atborth gan y Grŵp Rheoli Gwybodaeth.

CAMAU GWEITHREDU YN CODI: Y Pennaeth Swyddogaeth (Adnoddau) i roi diweddariad i’r Pwyllgor Archwilio yn ei gyfarfod nesaf ar y cynnydd gyda rhoi’r Cynllun Gweithredu Llywodraethu/Rheoli Gwybodaeth ar waith ag unrhyw faterion eraill oedd yn codi ynglŷn â hynny.

Cyflwyno adroddiad ynglyn â’r uchod.

Cyflwynwyd i ystyriaeth y Pwyllgor adroddiad gan y Pennaeth Swyddogaeth (Adnoddau) yn crynhoi’r cynnydd a wnaed gyda gweithredu’r Fframwaith Rheoleiddio Risg ynghyd â Chofrestr Risg Gorfforaethol newydd fel Atodiad A i’r adroddiad.

Roedd yr Uwch Ymgynghorydd Ariannol am atgoffa’r Pwyllgor bod y Strategaeth Rheoli Risg a’r Cyfarwyddyd wedi eu cymeradwyo a bod hyfforddiant ar y testun wedi ei ddarparu ac mai’r unig agwedd oedd yn parhau ar ôl oedd darparu diweddariad i’r Gofrestr Risg.  Roedd yr adroddiad yn amlinellu’r gwaith a wnaed hyd yn hyn yn cynnwys adolygiad gan Dim Uwch Arweinyddiaeth yr Awdurdod o ddiffiniadau’r risg, sbardunau a lefelau risg a hefyd nodi’r pum prif risg oedd yn wynebu’r Cyngor fel oedd i’w weld ym mharagraff 3.3 yr adroddiad.  Roedd y Gofrestr Risg Gorfforaethol yn nodi nifer o feysydd risg eraill yn ychwanegol i’r pump uchaf a bydd y matrics yn cael ei gwblhau unwaith y bydd y mesurau rheoli ychwanegol/triniaethau sydd eu hangen o ran gweithredu, swyddog(ion) cyfrifol a dyddiad targed wedi eu penderfynu a’u diffinio.  Cadarnhaodd y Pennaeth Swyddogaeth (Adnoddau) y byddai diweddariad pellach yn cael ei ddarparu i’r cyfarfod nesaf o’r Pwyllgor Archwilio.

Ystyriodd Aelodau’r Pwyllgor gynnwys yr adroddiad a’r Gofrestr Risg Gorfforaethol oedd ynghyd ag ef a gwnaethpwyd sylwadau ar y materion canlynol a/neu ceisiwyd cael eglurhad pellach –

·         Y meini prawf a ddefnyddiwyd i benderfynu beth oedd pum prif risg y Cyngor.

·         A oedd yn cael ei ystyried bod risg YM36 oedd yn cael ei diffinio fel methiant i gynllunio ar gyfer effaith diwygio’r sector iechyd wedi ei gyfyngu yn bennaf i’r Gwasanaethau Cymdeithasol neu a fyddai ei effaith yn fwy eang ar draws gwasanaethau’r Cyngor.

·         Y sail dros beidio cynnwys risg YM23 (methiant i weithredu cynnwys y cynllun arolygu ôl Estyn a gwella perfformiad yn erbyn dangosyddion allweddol), fel un o brif risgiau’r Cyngor o ystyried  termau disgrifio  canlyniad y methiant hwn yn y Gofrestr Risg.  Roedd teimlad bod peidio â chynnwys y risg hon ymysg y pump uchaf yn tynnu’n groes i’r hyn oedd yn cael ei ddweud yn y Gofrestr ynglyn â difrifoldeb y canlyniadau.

·         Ategwyd mai canlyniad nifer o’r meysydd risg fyddai’r posibilrwydd o niweidio enw da.  Awgrymwyd bod y potential o weld niwed i enw da ymhlyg ym mhopeth ac nid oes angen ei ailddweud ac yn fwy na hynny, fe ymddengys fod y cyfeiriadau yn rhai ar hap.  Awgrymwyd bod angen lleihau’r cyfeiriadau at niwed i enw da o fewn y Gofrestr.

Ymatebodd y Swyddogion i’r cwestiynau a ofynnwyd trwy gynnig esboniadau fel oedd yn briodol.

Penderfynwyd derbyn yr adroddiad a’r Gofrestr Risg Gorfforaethol oedd ynghyd ag ef ac i nodi eu cynnwys.

CAMAU GWEITHREDU YN CODI

·         Y Pennaeth Swyddogaeth (Adnoddau) i gynnwys diweddariad ar y Gofrestr Risg Gorfforaethol fel eitem sefydlog ar raglen y Pwyllgor Archwilio ynghyd â chofnodion y Grŵp Rheoli Risg lle byddai hynny yn briodol.

·         Y Pennaeth Swyddogaeth (Adnoddau) i godi’r pwyntiau canlynol gyda’r Tîm Uwch Arweinyddiaeth:

·         Y methiant i gynnwys YM23 fel un o’r pum prif risg gorfforaethol fel rhywbeth oedd yn  ...  Gweld y Cofnodion llawn ar gyfer eitem 3.

Diweddariad ar raglen waith perfformiad

Rhoddodd Mr Andy Bruce, Arweinydd Archwilio Perfformiad, Swyddfa Archwilio Cymru, ddiweddariad i’r Pwyllgor ar statws y gwaith a ddechreuwyd o dan y Rhaglen Waith Perfformiad fel oedd i’w weld yn yr adroddiad yn 4 ynghyd â chrynodeb ar ffurf tabl o’r gwaith oedd yn parhau a’r prosiectau a gynlluniwyd ar sail genedlaethol ac yn ymwneud a’r holl Gynghorau a hefyd ar sail Ynys Môn fel oedd i’w weld yn yr adroddiad yn eitem 5.  Cyfeiriodd y Swyddog at yr Adolygiad Llywodraethu Corfforaethol oedd yn digwydd ym mhob awdurdod unigol yng Nghymru ac a fydd yn eitem newydd i’r rhaglen fydd yn digwydd bob 4 blynedd.  Ni chafwyd y manylion ynglyn â pha bryd y bydd yr adolygiad Llywodraethu Corfforaethol yn cael ei gynnal ym Môn er nad oes disgwyl y bydd yr Awdurdod yn destun adolygiad ym Mlwyddyn 1.

Ystyriodd y Pwyllgor y wybodaeth oedd wedi ei chyflwyno a chafwyd trafodaeth ar y rhestr Adolygu Llywodraethu Corfforaethol o safbwynt lle mae Ynys Môn yn debygol o ffitio i mewn i’r cylch a hefyd ynglyn â gweithredu’r Cynllun Gweithredu Archwilio ôl Estyn o ran ceisio cael eglurhad o sut mae’r Bwrdd Adfer Addysg yn cysylltu i mewn i’r rhaglen reoleiddio.

Penderfynwyd nodi’r wybodaeth a ddarparwyd yn yr adroddiadau yn 4 a 5.

Diweddariad ar Gynllun Gwaith ac Amserlen Chwefror, 2012 - Mawrth, 2013.

Gweler eitem 4.

Diweddariad ar waith archwilio cyllidol

Cafwyd diweddariad gan Mr James Quance, PwC ar y cynnydd gyda’r archwilio ariannol yn erbyn y cerrig milltir allweddol yn Amlinelliad Archwilio Ariannol 2012/13 ac yng nghyswllt gwaith ardystio grantiau am 2010/11 a 2011/12.  Roedd yr adroddiad yn nodi’r llinell amser ar gyfer cyfnodau allweddol y broses Archwilio Cyfrifon 2012/13, sefyllfa gydag ardystio datganiad cyfrifon 2011/12 yn ogystal â hawliadau grant a hefyd y trefniadau cysylltu gydag Archwilio mewnol, Rheolwyr a Swyddfa Archwilio Cymru.

Penderfynwyd derbyn yr adroddiad a nodi ei gynnwys.

Amlinelliad o Archwiliad Ariannol Blynyddol.

Cyflwynodd Mrs Lynn Pamment, Swyddog Ymgysylltiad, PwC yr amlinelliad Archwilio Ariannol Blynyddol i’r Pwyllgor  ar gyfer blwyddyn archwilio 2012/13.  Roedd yr adroddiad yn nodi’r cyfrifoldebau archwilio o dan y ddeddfwriaeth a rheoliadau perthnasol, yr agwedd archwilio a gymerir tuag at y gwaith o archwilio’r datganiadau ariannol; y prif risgiau ariannol a gweithredol a wynebir gan yr Awdurdod ac a allai gael effaith ar yr archwiliad fel oedd i’w weld o dan Arddangosyn 1; cyfrifoldebau’r archwiliwr o safbwynt gwerthuso trefniadau’r Awdurdod i sicrhau economi, effeithlonrwydd ac effeithiolrwydd yn ei ddefnydd o adnoddau a hefyd ffi y gwaith archwilio a’r hyn oedd yn dod o fewn y gwaith hwnnw.

Ystyriodd Aelodau’r Pwyllgor gynnwys yr adroddiad ag fe ofynnwyd y cwestiynau canlynol a chafwyd ymatebion a manylion pellach gan y Swyddogion.

·         Y cysyniad o berthnasedd a sut y deuir i gasgliad am yr hyn a olygir trwy hynny.

·         A oedd asesiad yr Archwilydd o drefniadau’r Awdurdod ar gyfer sicrhau economi, effeithlonrwydd ac effeithiolrwydd yn ei ddefnydd o adnoddau wedi ei gyfyngu i archwilio’r gweithdrefnau neu a oedd yn cynnwys agwedd yr Awdurdod tuag at nodi a sicrhau arbedion a’r cyd-destun corfforaethol cyffredinol y gellir cynhyrchu arbedion o ‘i fewn.

·         Ffyrdd y gall yr Awdurdod liniaru’r risgiau wrth weithredu’r sustemau newydd.

Penderfynwyd derbyn yr adroddiad a nodi ei gynnwys.

Llythyr Asesiad Gwella

Cyflwynodd Mr Andy Bruce, Arweinydd Archwilio Perfformiad, Swyddfa Archwilio Cymru Lythyr Asesiad Gwella yr Archwilydd Cyffredinol (2) oedd yn crynhoi’r gwaith yng nghyswllt adrodd ar welliannau o dan Fesur Llywodraeth Leol (Cymru) 2009 ac yn benodol ganlyniad yr archwiliad a’r gwaith asesu i nodi a oedd Cyngor Sir Ynys Môn wedi cyflawni ei ddyletswyddau ac wedi bodloni gofynion y Mesur, pa mor ddibynadwy oedd ei hunan-arfarnu ac unrhyw gynigion pellach i wella ac/neu argymhellion.

Dywedodd Mr Andy Bruce wrth y Pwyllgor bod yr Archwilydd Cyffredinol wedi dod i’r farn bod y Cyngor wedi cydymffurfio yn llawn gyda’i ddyletswyddau adrodd am wella o dan y Mesur ond y gallai cynnwys a strwythur Adroddiad Perfformiad y Cyngor 2011/12 gynnwys mwy o wybodaeth ansoddol er mwyn darparu sail tystiolaeth fwy cyflawn i alluogi’r Cyngor asesu ei berfformiad.  Wrth ymhelaethu ar y casgliadau y daethpwyd iddynt cyfeiriodd at y pwynt eglurhaol ar dudalen 2 y Llythyr oedd yn dangos y ffyrdd yr oedd yr Adroddiad yn bodloni’r holl elfennau oedd eu hangen.  Roedd tudalen 3 y Llythyr yn egluro ym mha ffyrdd  y gallai cynnwys a strwythur yr Adroddiad Gwella Perfformiad gynnwys mwy o wybodaeth ansoddol i ddarparu sail tystiolaeth fwy cyflawn.  Mae’r Archwilydd Cyffredinol yn cynnwys dau gynnig i wella mewn perthynas â sicrhau cysondeb ar draws gwasanaethau yn ansawdd yr hunan-arfarnu a gyda sicrhau gwell rheolaeth olygyddol ar yr adroddiad.

Dywedodd y Swyddog bod adroddiad perfformiad y Cyngor yn gyffredinol am 2011/12 yn un gadarnhaol ac yn ddarn o waith calonogol iawn.

Penderfynwyd derbyn y Llythyr Asesu a nodi ei gynnwys.

Cyflwyno adroddiad cynnydd Archwilio Mewnol.

Cyflwynodd y Rheolwr Archwilio er ystyriaeth y Cyngor adroddiad cynnydd ar waith yr Adain Archwilio Mewnol am y cyfnod o 1 Ebrill i 31 Rhagfyr 2012.

Roedd y Rheolwr Archwilio am amlygu’r pwyntiau allweddol canlynol o’r adroddiad –

·         Ni fu unrhyw adolygiadau yn y cyfnod lle cafwyd barn Sicrwydd Coch.

·         Roedd y canfyddiadau allweddol o’r tri adroddiad adolygu archwilio a ryddhawyd i’w gweld yn adran 2.2 yr adroddiad.

·         Roedd perfformiad o ran cyfartaledd y Cynllun Archwilio a gwblhawyd  i fyny o 46%  i 53% ond mae’n parhau i fod lawer yn is na’r targed o 90%.  Un ffactor sy’n cyfrannu at hyn yw’r un ar ddeg o atgyfeiriadau a gwblhawyd ac yr adroddwyd arnynt yn y cyfnod ac sydd wedi dargyfeirio adnoddau oddi wrth waith archwilio mewnol a gynlluniwyd.

·         Mae’r perfformiad yn gweithredu ar argymhellion yn y cyfnod yn parhau yn is na’r targed gyda 68% o argymhellion Uchel a Chanolog wedi eu cofnodi fel rhai y gweithredwyd arnynt.  Roedd y dadansoddiad o’r argymhellion a gyflawnwyd gan y gwasanaethau i’w weld yn Atodiad A yr adroddiad.

Ystyriodd yr Aelodau yr adroddiad a gofynnwyd i’r Swyddog egluro rhai pwyntiau ynglyn â’r trefniadau ar gyfer sgriwtineiddio taliadau uniongyrchol y Gwasanaethau Cymdeithasol mewn ffyrdd ar wahân i archwilio mewnol, a hefyd ynghylch materion llywodraethu a rheoli o fewn ysgolion a gofynnwyd a oedd unrhyw ystyriaeth wedi ei roi i gyflogi person i gadw llyfr ac i ddarparu cymorth peripatetig i ysgolion yn hyn o beth.  Ymatebodd y Swyddogion i’r pwyntiau a wnaed.

Penderfynwyd derbyn yr adroddiad cynnydd a nodi ei gynnwys.

Cyflwyno adroddiad ynglyn â’r uchod.

Cyflwynodd y Rheolwr Archwilio er ystyriaeth y Pwyllgor, adroddiad yn manylu ar ganlyniad yr Hunanasesiad Effeithlonrwydd 2013 (Atodiad B i’r adroddiad) ynghyd a Chynllun Gweithredu Gwella ar gyfer 2013/14 (Atodiad C i’r adroddiad).

Tynnodd y Rheolwr Archwilio sylw at y prif ystyriaethau a ganlyn o’r adroddiad –

·         Meysydd gwella a nodwyd yng ngweithdy Ionawr 2013 i Aelodau’r Pwyllgor Archwilio yn cynnwys gwella hyfforddiant anwytho a dadansoddiad o anghenion hyfforddiant unigol i Aelodau; eglurhad o rolau’r Pwyllgorau Archwilio a Sgriwtini mewn perthynas â rheoli risg, mabwysiadu canllawiau Atal Twyll a Llygredd, gwell cyswllt mewn perthynas â chynllunio a pherfformiad Archwilio Allanol.

·         Trefniadau Atal Twyll - mae angen gweithredu er mwyn i’r Pwyllgor gael sicrwydd bod trefniadau atal twyll cyfredol y Cyngor yn effeithiol ac yn cael eu gweithredu yn unol â chyfarwyddwyd CIPFA - Rheoli’r Risg o Dwyll - Camau i Atal Twyll a Llygredd.  Argymhellir cynnal Sesiwn Ymwybyddiaeth Twyll i Aelodau’r Pwyllgor er mwyn iddynt dderbyn gwybodaeth am y trefniadau a’r  materion cyfredol yn ogystal â chael gwybod beth yw anghenion cyfarwyddyd CIPFA.

Ystyriodd yr Aelodau yr adroddiad ac fe wnaed y pwynt y dylai’r Pwyllgor Archwilio, yn ogystal â chynnal hunanasesiad blynyddol, ystyried dulliau o sicrhau barn allanol ar ei berfformiad a’i effeithlonrwydd fel Pwyllgor.

Penderfynwyd –

·         Cymeradwyo canlyniad yr hunanasesiad a wnaed o effeithlonrwydd y Pwyllgor ynghyd â’r Cynllun Gweithredu Gwella fel oedd i’w weld yn Atodiad C.

·         Bod y sesiynau hyfforddi ymwybyddiaeth twyll yn cael eu cynnwys yn rhestr hyfforddiant y Pwyllgor ar gyfer 2013/14 er mwyn rhoi gwybodaeth am effeithlonrwydd trefniadau cyfredol y Cyngor i Atal Twyll a Llygredd.

·         Bod hunanasesiad newydd ar effeithlonrwydd y Pwyllgor yn cael ei gynnwys yn ei gynllun gweithredu ar gyfer 2013/14 ac ychwanegu y dylid cael darpariaeth yn cael ei wneud i sicrhau y gellid cael barn allanol.

PWYNTIAU GWEITHREDU YN CODI :

·         Y Rheolwr Archwilio i wneud trefniadau ar gyfer sesiwn hyfforddi ymwybyddiaeth twyll i’r Pwyllgor yn y dyfodol fel rhan o’i Raglen Hyfforddi 2013/14.

·         Y Rheolwr Archwilio i gymryd camau i gynnwys o fewn cynllun gwaith y Pwyllgor hunanasesiad newydd ar effeithlonrwydd y Pwyllgor.

·         Y Rheolwr Archwilio i ymgynghori gyda RSM Tenon gyda golwg ar ddwyn yn ol i’r Pwyllgor opsiynau i gael agwedd allanol ar berfformiad ag effeithlonrwydd y Pwyllgor.

Cyflwyno Adroddiad Blynyddol drafft y Pwyllgor Archwilio.

Cyflwynodd y Cadeirydd Adroddiad Blynyddol y Pwyllgor Archwilio ar gyfer blwyddyn ddinesig 2012/13.  Roedd yr adroddiad yn rhoi crynodeb o waith a gweithgareddau’r Pwyllgor Archwilio yn ystod y flwyddyn yn cynnwys y cyfarfodydd a gynhaliwyd a’r presenoldeb ynddynt; y meysydd/materion allweddol yr ymdriniwyd â hwy a’r hyfforddiant a drefnwyd ac a ddarparwyd.

Ceisiodd y Cadeirydd gael cymeradwyaeth y Pwyllgor i gynnwys, fel rhan o’r Adroddiad Blynyddol, gofnod presenoldeb yr Aelodau yn y cyfarfodydd o’r Pwyllgor ac mewn digwyddiadau hyfforddi yn ystod y flwyddyn.  Roedd yr Aelodau yn gefnogol i gynnwys manylion am bresenoldeb yr Aelodau fel elfen yn yr adroddiad ac fel arfer dda gyda’r amod bod y rhestr presenoldeb hyfforddi yn Atodiad B yn cael ei diwygio i ddangos bod y Cynghorydd Alun Mummery yn bresennol yn y sesiwn ar 16 Hydref 2012.

Penderfynwyd cymeradwyo’r Adroddiad Blynyddol 2012/13 i’w chyflwyno i’r Cyngor Sir yn ei gyfarfod ym Mai, 2013, gyda’r gwelliant a nodwyd.

CAMAU GWEITHREDU YN CODI :

·         Rheolwr Archwilio i newid y rhestr presenoldeb mewn cyrsiau hyfforddi yn Atodiad B i adlewyrchu bod y Cynghorydd Alun Mummery yn bresennol yn y sesiwn ar 16 Hydref 2012.

·         Rheolwr Archwilio i wneud y trefniadau angenrheidiol i gyflwyno’r Adroddiad Blynyddol i’r Cyngor Llawn ym mis Mai.

12.1 Cyflwyno Adroddiad Rheoli Trysorlys Chwarter 3

12.2 Cyflwyno Datganiad Strategaeth Rheoli Trysorlys 2013/14 drafft

12.1 Cyflwynwyd adroddiad Rheoli Trysorlys am y Trydydd Chwarter o flwyddyn ariannol 2012/13 er ystyriaeth y Pwyllgor.  Roedd yr adroddiad yn rhoi diweddariad i’r Aelodau ar weithgareddau rheoli trysorlys yn Chwarter 3 o fewn cyd-destun y cefndir a’r rhagolygon economaidd ehangach.

Cyfeiriodd y Pennaeth Gwasanaeth (Cyllid) at y sefyllfa mewn perthynas â gweithgareddau benthyca’r Awdurdod a’i bortffolio buddsoddiadau gan gyfeirio yn arbennig at ailfuddsoddi gyda RBS ar aeddfedu yn ystod y chwarter, buddsoddiad tymor penodol o £5m am 364 diwrnod ar raddfa o 1.58%.  Ni wnaed unrhyw fuddsoddiadau tymor sefydlog eraill nac unrhyw fenthyca newydd nac aildrefnu dyled.  Dywedodd y Swyddog bod y Cyngor yn ystod y chwarter wedi parhau o fewn ei Gyfyngiadau Pwyllog a Thrysorlys fel oeddent wedi eu nodi yn Atodiad 2 yr adroddiad.  Roedd y cynlluniau ar gyfer gweddill y flwyddyn wedi eu hamlinellu o dan baragraff 7 yr adroddiad.

Penderfynwyd derbyn yr adroddiad a nodi ei gynnwys

12.2 Cyflwynwyd Datganiad Strategaeth Rheoli Trysorlys 2013/14 i’r Pwyllgor ei ystyried fel rhan o’r ymgynghori ar faterion cyllideb cyn ei gyflwyno i’r Pwyllgor Gwaith.  Roedd y strategaeth ar gyfer 2013/14 yn delio a dau brif faes, sef materion cyfalaf a materion rheoli trysorlys yn cynnwys ymysg agweddau eraill, y strategaeth fenthyca, strategaeth fuddsoddi ac aildrefnu dyled.

Tynnodd y Pennaeth Gwasanaeth (Cyllid) sylw arbennig at y materion a ganlyn –

·         Y Polisi Buddsoddi fel oedd i’w weld o dan adran 4.2 yr adroddiad yn cynnwys darpariaeth fel oedd wedi ei amlygu oedd yn caniatáu i’r Awdurdod lle bo hynny’n briodol, fuddsoddi neu i roi arian ar adneu mewn undeb credyd neu debyg i bwrpas darparu ei wasanaeth gyda’r nod pan fyddai’r newidiadau diwygio lles arfaethedig yn cael eu gweithredu y bydd yna ar gael i’r rhai a effeithir gan y newidiadau, ffynhonnell ddiogel a heb fod yn ddrud o fenthyca arian.  Tra roedd hyn yn bosibilrwydd ar hyn o bryd roedd y strategaeth wedi ei haddasu fel oedd wedi ei amlinellu mewn termau amhenodol yng nghyswllt gwrthbartion, er mwyn caniatáu i hyn ddigwydd.

·         Atodiad 5 - Y Rhestr Fenthyca Gymeradwy yn ol Credyd.  Bydd angen diwygio Adran 4.1 (buddsoddiadau penodol) i egluro bod Banciau'r DU sydd wedi eu cenedlaetholi neu led genedlaetholi y tu allan i’r meini prawf penodol, ac mai eu statws o fod wedi eu gwladoli neu eu gwladoli’n rhaddol sy’n rhoi eu sgôr credyd.

·         Cynllun Morgais yr Awdurdod Lleol lle mae’r Awdurdod yn ystyried cymryd rhan.  Pe bai hyn yn digwydd, byddai angen diwygio’r Strategaeth i nodi hynny.

Rhoddwyd cyfle i’r Aelodau ofyn cwestiynau a cheisio cael eglurhad ar unrhyw agweddau o’r Datganiad Strategaeth Rheoli Trysorlys.

Penderfynwyd derbyn y Datganiad Strategaeth Rheoli Trysorlys am 2013/14 a nodi ei chynnwys.

CAMAU GWEITHREDU YN CODI : Y Pennaeth Gwasanaeth (Cyllid) i ddiwygio Atodiad 5 y Datganiad Strategaeth Rheoli Trysorlys fel a amlinellwyd, cyn ei gyflwyno i’r Pwyllgor Gwaith.