Rhaglen a chofnodion

Rhoes y Cadeirydd groeso i bawb a oedd yn bresennol i’r cyfarfod hwn o’r Cyngor Sir a gan mai hwn oedd ei gyfarfod diwethaf ef fel Cadeirydd, diolchodd i’r Swyddogion a’r Aelodau am eu cefnogaeth yn ystod ei gyfnod yn y swydd.

Cyflwyno i’w cadarnhau gofnodion y cyfarfodydd o’r Cyngor Sir a gynhaliwyd ar y dyddiadau a ganlyn:-

·         27 Chwefror, 2014

·         27 Mawrth, 2014 (Arbennig)

Cyflwynwyd a chadarnhawyd fel rhai cywir, gofnodion y cyfarfodydd o’r Cyngor Sir a gynhaliwyd ar 27 Chwefror 2014 a 27 Mawrth 2014.

Derbyn unrhyw ddatganiad o ddiddordeb gan unrhyw Aelod neu Swyddog yng nghyswllt unrhyw eitem o fusnes.

Gwnaeth y Cynghorydd Jim Evans ddatganiad o ddiddordeb yn Eitem 5 ar y rhaglen.  Arhosodd yn y cyfarfod am y cyflwyniad ond aeth allan yn ystod y sesiwn cwestiwn ac ateb a gafwyd wedyn.

Dywedodd y Cadeirydd fod grŵp gwleidyddol newydd wedi cael ei ffurfio o’r enw Grŵp y Chwyldroadwyr a bod y grŵp yn cynnwys y Cynghorydd Jeff Evans fel Arweinydd y Grŵp a’r Cynghorydd Peter Rogers.

Ymwelodd y Gwir Anrhydeddus Carwyn Jones, AM a Phrif Weinidog Cymru â Chymunedau’n Gyntaf ar Ynys Môn yr wythnos ddiwethaf a gwelodd yr Academi Alwedigaethol a’r cynllun LIFT sy’n cefnogi aelwydydd di-waith i gael hyfforddiant ac/neu swyddi.  Llongyfarchodd y Prif Weinidog y Cyngor ar arwain ar y Rhaglen Gwrthdlodi a’r staff am eu gwaith ardderchog.  Rhaglen Cymunedau’n Gyntaf Ynys Môn yw’r un fwyaf llwyddiannus yng Nghymru o ran cael gwaith ac/neu hyfforddiant i bobl ddi-waith.

Ar ddydd Sul, Ebrill 27, cynhaliwyd seremoni yn Fferm Neuadd, Llanbadrig i ddadorchuddio plac er cof am y ffermwr  a ddaeth i gael ei adnabod fel tad y Corfflu Cymreig, y Brigadydd Gadfridog Syr Owen Thomas. Rhagor na 90 blynedd ar ôl iddo farw, mae Syr Owen Thomas yn parhau i gael ei gydnabod fel ffigwr ysbrydoledig ac am ei allu fel arweinydd rhagorol.   Roedd yn anrhydedd cael bod yn bresennol yn y seremoni i gydnabod ac i dalu teyrnged i lwyddiant aruthrol Syr Owen Thomas gan gynnwys ei wasanaeth i’w gymuned, i Ynys Môn a’i wlad.

Diolchodd y Cadeirydd i’r Cynghorydd Aled Morris Jones ac i Mrs Pat West, Prif Swyddog Amgueddfeydd am drefnu’r digwyddiad arbennig hwn.

Llongyfarchwyd Clwb Ffermwyr Ifanc Rhos-y-bol ar ei lwyddiant yn ddiweddar yng Nghystadleuaeth Adloniant Ffermwyr Ifanc Cymru yn Venue Cymru, Llandudno ac am gipio’r drydedd wobr.

Yn ogystal, llongyfarchwyd y Cynghorydd Carwyn Jones am ennill y wobr gyntaf am actio ac am ei bortread o Mrs Brown o “Mrs Brown’s Boys”, ac i Elin Haf Morris Jones am ennill y wobr gyntaf am ei phortread o Vera o “Gwlad yr Astra Gwyn.”

Mynegodd y Cadeirydd ei gydymdeimlad ef a’r Aelodau â theulu Mr Richard Jones, cyn Brifathro Ysgol Kingsland, Caergybi.  Roedd y diweddar Mr Jones yn dod yn wreiddiol o Gaergeiliog ond treuliodd ei flynyddoedd diweddaraf ym Miwmares.  Mynegwyd cydymdeimlad hefyd ag unrhyw Aelodau o’r Cyngor neu staff a oedd wedi cael profedigaeth.  Safodd yr Aelodau a’r Swyddogion fel arwydd o gydymdeimlad a pharch.

Derbyn unrhyw ddeiseb yn unol â Pharagraff 4.1.11 y Cyfansoddiad.

Ni chafwyd yr un ddeiseb.

I dderbyn cyflwyniad gan Non Tudur Williams, Uwch-Reolwr Rhanddeiliaid – Yn unol â phenderfyniad y Cyngor Sir ar 27 Chwefror, 2014, gwahoddwyd uwch gynrychiolwyr o Swyddfa’r Post i annerch y Cyngor mewn perthynas â’u cynlluniau ar gyfer rhyddfreinio’r Swyddfeydd Post Brenhinol yng Nghaergybi a Llangefni.

Neilltuir cyfnod o gwestiynau ac atebion i’r Aelodau.

Rhoes y Cadeirydd groeso i Non Tudur Williams, Uwch Reolwraig Cydranddeiliaid a Mr John Jones, Rheolwr Ardal Gwasanaeth Swyddfeydd Post y Goron i’r cyfarfod a oedd, fel uwch gynrychiolwyr y Swyddfa Bost wedi cael gwahoddiad i annerch y Cyngor yn unol â’r penderfyniad a wnaed gan y Cyngor yn ei gyfarfod ar 27 Chwefror, 2014.

Rhoes Non Tudur Williams gyflwyniad i’r Aelodau ar strategaeth a gweledigaeth y Swyddfa Bost ar gyfer dyfodol rhwydwaith cyfan y Swyddfa Bost yn y dyfodol gan gynnwys Swyddfeydd Post y Goron er mwyn cwrdd â’r her o ddiwallu anghenion a dyheadau cwsmeriaid mewn gwahanol ffyrdd a sicrhau darpariaeth sy’n ariannol ymarferol, cynaliadwy a chyfoes.  Rhoes amlinelliad o’r ddarpariaeth gyfredol yn Ynys Môn a’r modd y caiff ei chyflawni ac eglurodd y sefyllfa ddiweddaraf mewn perthynas â’r cynlluniau ar gyfer rhyddfreinio Swyddfeydd Post y Goron yng Nghaergybi a Llangefni.

Ar ddiwedd yr anerchiad, rhoddwyd y cyfle i’r Aelodau ofyn cwestiynau i gynrychiolwyr y Swyddfa Bost yn arbennig felly o ran eu pryderon ynglŷn â’r cynlluniau ar gyfer Swyddfeydd Post y Goron yn Llangefni a Chaergybi a goblygiadau ac effeithiau hynny o ran cyflogaeth, hwylustod y gwasanaethau a’r ymdrechion sy’n mynd rhagddynt i adfywio canol trefi Llangefni a Chaergybi.  Pwysleisiodd cynrychiolwyr y Swyddfa Bost ymrwymiad y Swyddfa Bost i fod wrth wraidd y gymuned a dywedasant fod rhaglen drawsnewid y goron a rhaglen drawsnewid y rhwydwaith yn ehangach yn un a oedd yn canolbwyntio ar fuddsoddiad, canghennau newydd, dulliau newydd o ddarparu gwasanaeth ac oriau agor hirach a mwy hyblyg.

Diolchodd y Cadeirydd i gynrychiolwyr y Swyddfa Bost am roddi o’u hamser i fynychu’r cyfarfod hwn o’r Cyngor Sir ac am ymateb i gwestiynau a phryderon yr Aelodau.

(a)      Cyflwyno adroddiad gan y Dirprwy Brif Weithredwr fel a gyflwynwyd i’r Pwyllgor Gwaith ar 22 Ebrill, 2014.

(b)       Cyflwyno sylwadau’r Pwyllgor Gwaith ar y Cynllun Gwella.

PENDERFYNWYD derbyn y Ddogfen Ddarparu Flynyddol am 2014/15 ac argymell ei fabwysiadu gan y Cyngor Sir yn ei gyfarfod i’w gynnal ar 8 Mai, 2014.

Cafodd adroddiad y Dirprwy Brif Weithredwr a oedd yn cynnwys y Ddogfen Cyflawniad Blynyddol (Cynllun Gwella) ar gyfer 2014/15 fel y cafodd ei  gyflwyno i’r Pwyllgor Gwaith ar 22 Ebrill 2014 ei roi gerbron y Cyngor i’w ystyried.

Dywedodd yr Aelod Portffolio ar gyfer Perfformiad, Trawsnewid, y Cynllun Corfforaethol ac Adnoddau Dynol fod y Ddogfen Cyflawni yn egluro sut y bydd y Cyngor yn cyflawni ar ei addewidion yn ystod y flwyddyn nesaf a bod y Pwyllgor Gwaith yn ei gyfarfod ar 22 Ebrill wedi penderfynu derbyn y Ddogfen Cyflawni Flynyddol ar gyfer 2014/15 ac wedi argymell fod y Cyngor Sir yn ei chymeradwyo yn ei gyfarfod ar 8 Mai 2014.

Cyfeiriodd y Cynghorydd Peter Rogers at yr amcanion ar gyfer trawsnewid Gwasanaethau Hamdden yr Awdurdod ac yn arbennig felly, nodi model gwasanaeth newydd ar gyfer Cwrs Golff Llangefni a phwysleisiodd bod angen gwneud penderfyniadau ynghylch datblygu ac/neu ddadgomisiynu asedau gyda dealltwriaeth a gwerthfawrogiad llawn o oblygiadau hynny a’r hyn y bydd eu gweithredu’n ei olygu.  Cyfeiriodd yn benodol hefyd at y Camerâu Goruchwylio.  Cadarnhaodd y Cynghorydd   Aled Morris Jones, yr Aelod Portffolio ar gyfer Datblygu Economaidd, Twristiaeth a Hamdden fod ymrwymiad eisoes wedi ei wneud yn y Pwyllgor Sgriwtini ac y byddir yn edrych ar holl asedau’r Cyngor, gan gynnwys y Clwb Golff yn Llangefni.

Penderfynwyd mabwysiadu’r Ddogfen Cyflawni Flynyddol (Cynllun Gwella) ar gyfer 2014/5.

Cyflwyno adroddiad gan y Pennaeth Dros Dro Gwasanaethau Democrataidd. – ADRODDIAD HWYR

Cyflwynwyd i’w ystyried – yr adroddiad gan Bennaeth Dros Dro y Gwasanaethau Democrataidd ynghylch trefniadau cydbwysedd gwleidyddol yn y Cyngor.

Dywedwyd bod angen i’r Cyngor adolygu’r trefniadau cydbwysedd gwleidyddol ar ei bwyllgorau yn dilyn rhybudd fod un Aelod wedi gadael y Grŵp Annibynnol, a bod Grŵp newydd wedi cael ei sefydlu yn dilyn hynny, sef y Grŵp Chwyldroadwyr ac arno 2 Aelodau a rhybudd fod un Aelod digyswllt wedi ymuno gyda’r Grŵp Annibynnol. Cylchredwyd yn y cyfarfod fatrics newydd a oedd yn nodi nifer y seddau yr oedd gan bob un o’r grwpiau hawl iddynt a nifer y seddau a ddyrennir i Aelodau digyswllt yn ôl yr arfer yn lleol fel y cafodd ei gadarnhau gan y Cyngor ar 5 Rhagfyr 2013.

Dygodd y Cynghorydd Aled Morris Jones sylw at y ffaith bod ei ddynodi ef fel Aelod digyswllt yn gamgymeriad oherwydd mae’n aelod o grŵp gwleidyddol cenedlaethol - y Democratiaid Rhyddfrydol Cymreig, a gofynnodd i hynny gael ei adlewyrchu yn y matrics.

Eglurodd dy Pennaeth Swyddogaeth (Adnoddau) bod defnydd o’r ymadrodd “digyswllt” yn cael ei dynnu o Ddeddf Llywodraeth Leol a Thai 1989 ac mae’n cyfeirio at y ffaith bod Aelodau, i bwrpas cydbwysedd gwleidyddol, yn rhai digyswllt oni bai eu bod yn aelodau o grŵp ar y Cyngor p’un a ydynt yn aelodau o blaid wleidyddol y tu allan i’r Cyngor ai peidio. Awgrymodd fod y cywiriad yn cael ei gofnodi a bod troednodyn esboniadol yn cael ei ychwanegu at y matrics cydbwysedd gwleidyddol. Cytunwyd y byddai troednodyn yn cael ei gynnwys yn y matrics safonol ar gyfer y dyfodol yn egluro fod “digyswllt” yn golygu’r rheiny nad ydynt yn rhan o’r grwpiau gwleidyddol a gynrychiolir ar y Cyngor.

Cyfeiriodd y Cynghorydd Dylan Rees at gofnodion y cyfarfod y Cyngor ym mis Rhagfyr 2013 a oedd yn adlewyrchu’r ffaith ei fod wedi gofyn i’r Arweinydd a oedd yn arfer dda i gael y ddau Aelod Llafur ar y Pwyllgor Gwaith yn wyneb y ffaith mai nhw oedd yr unig ddau Gynghorydd Llafur allan o gyfanswm y Cyngor o dri deg. Dywedodd yr Arweinydd y byddai’n darparu ymateb ysgrifenedig i’r cwestiwn ac nad oedd wedi cael yr ateb hwnnw, cadarnhaodd y Cynghorydd Rees ei fod wedi trafod y mater gyda’r Arweinydd a oedd wedi dweud ei fod eisiau sicrhau sefydlogrwydd cyn ystyried unrhyw newidiadau i gydbwysedd gwleidyddol. Gan fod hynny bum mis yn ôl, gofynnodd y Cynghorydd Rees a yw’r Arweinydd yn awr yn bwriadu gweithredu ynglŷn â’r diffyg cydbwysedd gwleidyddol ar y Pwyllgor Gwaith?

Dywedodd Arweinydd y Cyngor ei fod wedi rhoi sylw difrifol i’r mater ac ail-ddatganodd ei fod yn credu fod sefydlogrwydd yn bwysig.  Eglurodd fod y grwpiau Annibynnol a Llafur wedi sefydlu partneriaeth ac fel rhan o’r bartneriaeth honno, penderfynwyd y byddai’r ddau Aelod Llafur yn gwasanaethu ar y Pwyllgor Gwaith ac maent wedi gwneud cyfraniad gwerthfawr.  Cadarnhaodd yr Arweinydd nad oedd yn bwriadu gwneud unrhyw newidiadau ar hyn o bryd.

Penderfynwyd –

•  Cadarnhau’r trefniadau cydbwysedd gwleidyddol  ...  Gweld y Cofnodion llawn ar gyfer eitem 7.

Cyflwyno adroddiad gan y Pennaeth Dros Dro Gwasanaethau Democrataidd.

Cyflwynwyd i’w ystyried – adroddiad gan Bennaeth Dros Dro y Gwasanaethau Democrataidd ar y cynllun ar gyfer cydnabyddiaeth ariannol i Aelodau.  Yn yr adroddiad, nodwyd penderfyniadau Panel Annibynnol ar Gydnabyddiaeth Ariannol (IRP) ar gyfer  2013/14 o ran cyflogau sylfaenol a chyflogau lefel uwch, cyflogau dinesig, taliadau i aelodau cyfetholedig a thaliadau a lwfansau eraill ynghyd â manylion cyfyngiadau lle mae hynny’n berthnasol ac fel a bennwyd yn ei adroddiad blynyddol dyddiedig Chwefror 2014.

Penderfynwyd –

•  Cadarnhau dyrannu uwch gyflogau i ddeilyddion swyddi ar gyfer 2014/15 yn unol â pharagraff 2.12 yr adroddiad.

•  Cadarnhau y dylai lwfansau Lefel C fel y penderfynwyd arnynt gan yr IRP fod yn daladwy i swyddi’r pennaeth a’r ddiprwy bennaeth dinesig gan gymryd i ystyriaeth y baich gwaith a’r cyfrifoldebau a ragwelir yn unol â pharagraff 2.6 yr adroddiad.

•  O safbwynt taliadau i Aelodau cyfetholedig, ni fydd cap blynyddol yn cael ei gyflwyno ar gyfer gwaith paratoadol (paragraff 3.5 yr adroddiad).

•  Nodi manylion eraill ar daliadau a lwfansau ar gyfer 2014/14 fel y cânt eu pennu gan yr IRP a’u hamlinellu yn yr adroddiad.

Ystyried Adroddiad Blynyddol Arweinydd Cyngor Sir Ynys Môn yn unol â pharagraff 4.1.16 y Cyfansoddiad. – I’W GYFLWYNO YN Y CYFARFOD

Cyflwynwyd adroddiad Cadeirydd y Pwyllgor Archwilio ar waith y Pwyllgor yn ystod blwyddyn ddinesig 2013/14.  Yn absenoldeb Cadeirydd ac Is-Gadeirydd y Pwyllgor Archwilio, cyflwynwyd yr adroddiad gan y Cynghorydd Jim Evans fel aelod o’r Pwyllgor Archwilio.

Cyfeiriodd y Cynghorydd Dylan Rees at adroddiad mewnol beirniadol ar drefniadau caffael y Cyngor ac ar awgrymiad a wnaed gan CLlLC mewn erthygl ar brynu nwyddau a gwasanaethau, y dylai awdurdodau lleol gynhyrchu adroddiad caffael blynyddol a nodi aelod arweiniol ar y Pwyllgor Gwaith a Swyddog Arweiniol a fyddai’n gyfrifol am sicrhau fod trefniadau caffael mor effeithlon â phosib a sicrhau fod gan gynghorwyr rheng-flaen rôl benodol o ran adolygu a sgriwtineiddio caffael.  Gofynnodd a oedd y Cynghorydd Jim Evans yn cytuno y byddai honno’n arfer dda ar gyfer Cyngor Sir Ynys Môn. Dywedodd y Cynghorydd Dylan Rees ei fod yn hapus i’r Cynghorydd Jim Evans gyfeirio’r cwestiwn at yr Arweinydd.

Dywedodd yr Arweinydd ei fod yn cytuno gyda’r awgrymiadau a wnaed a dywedodd fod cyfarfod arbennig o’r Pwyllgor Archwilio wedi cael ei gynnal ddiwedd y mis diwethaf pryd y rhoddwyd sylw manwl i fater caffael yn y Cyngor a bod argymhellion ar gyfer gwella’r trefniadau caffae wedi esblygu o’r cyfarfod hwnnw.

Nododd yr Aelodau fod cynnwys, fel rhan o’r Adroddiad Blynyddol, wybodaeth ynghylch presenoldeb aelodau yng nghyfarfodydd y Pwyllgor Archwilio yn ystod y flwyddyn yn ddefnyddiol ac awgrymwyd y dylid efelychu hynny mewn adroddiadau blynyddol eraill.

Penderfynwyd derbyn Adroddiad Blynyddol Cadeirydd y Pwyllgor Archwilio a nodi ei gynnwys.

Cyflwyno adroddiad gan Gadeirydd y Pwyllgor Archwilio.

Rhoes y Cynghorydd Ieuan Williams, Arweinydd y Cyngor amlinelliad ar lafar o brif ddigwyddiadau’r 12 mis diwethaf gan ganolbwyntio ar ddatblygiadau a oedd yn tystio i welliant, cynnydd ac aeddfedrwydd parhaus y Cyngor.

Mynegodd rhai Aelodau o’r Cyngor eu siom nad oedd adroddiad blynyddol yr Arweinydd wedi bod ar gael iddynt yn ysgrifenedig cyn y cyfarfod yn unol â’r hyn a nodwyd ar y Rhaglen.  Cadarnhaodd y Pennaeth Swyddogaeth (Busnes y Cyngor) fod rhaid i Arweinydd y Cyngor, yn unol â thelerau’r Cyfansoddiad, ddarparu Adroddiad Blynyddol ar ffurf i’w gytuno arno gyda Chadeirydd y Cyngor.  Yn y dyfodol, awgrymwyd y dylai fersiwn ysgrifenedig o’r adroddiad gael ei gylchredeg i Aelodau wedi i’r Arweinydd ei gyflwyno. Awgrymwyd hefyd y dylai cynnwys yr Adroddiad Blynyddol fod yn fwy cytbwys a sôn hefyd am unrhyw nodau ac amcanion na fu modd eu cyflawni erbyn diwedd y flwyddyn.

Penderfynwyd derbyn Adroddiad Blynyddol yr Arweinydd a nodi ei gynnwys.

Cyflwyno adroddiad gan Mr Michael Wilson, Cadeirydd y Pwyllgor Safonau.

Cyflwynwyd – adroddiad Cadeirydd y Pwyllgor Safonau, Mr Michael Wilson ar raglen weithgareddau’r Pwyllgor yn ystod  2013-14 ynghyd â’i raglen arfaethedig ar gyfer 2014-15.

Penderfynwyd -

•  Nodi’r rhaglen a gyflawnwyd gan y Pwyllgor Safonau rhwng Ebrill 2013 a Mai 2014.

•  Cymeradwyo rhaglen y Pwyllgor Safonau ar gyfer 2014/15 fel y cafodd ei hamlinellu yn Atodiad B yr adroddiad.

Cyflwyno adroddiad gan Gadeirydd y Pwyllgor Sgriwtini Corfforaethol.

Cyflwynwyd – Adroddiad Blynyddol Sgriwtini yn manylu ar y gwaith a wnaed gan ddau bwyllgor sgriwtini’r Cyngor o 23 Mai 2013 i 8 Mai 2014.

Fel yr Eiriolwr Sgriwtini cyfredol, pwysleisiodd y Cynghorydd R. Meirion Jones swyddogaeth sgriwtini fel ffrind beirniadol ac mewn perthynas â gostwng nifer y pwyllgorau sgriwtini o 5 i 2, nododd fod y Cyngor Sir wedi dweud y byddai’n adolygu’r trefniant hwn ar ddiwedd y flwyddyn.

Penderfynwyd -

•  Nodi a chymeradwyo Adroddiad Blynyddol y Pwyllgorau Sgriwtini.

•  Penodi’r Cynghorydd Peter Rogers yn Eiriolwr Sgriwtini o fis Mai 2014 hyd fis Mai 2015.

Cyflwyno adroddiad gan Gadeirydd y Pwyllgor Gwasanaethau Democrataidd.

Cyflwynwyd - adroddiad gan Gadeirydd y Pwyllgor Gwasanaethau Democrataidd ar waith y Pwyllgor yn ystod 2013/14.

Penderfynwyd derbyn yr adroddiad a nodi’r materion a drafodwyd fel rhan o raglen waith y Pwyllgor ar gyfer 2013/14.

Cyflwyno adroddiad gan y Pennaeth Dros Dro Gwasanaethau Democrataidd.

Cyflwynwyd – adroddiad Pennaeth Dros Dro y Gwasanaethau Democrataidd yn ymgorffori Cynllun Hyfforddiant arfaethedig ar gyfer yr Aelodau am y flwyddyn nesaf.

Penderfynwyd mabwysiadu ac ymgymryd â’r Cynllun Hyfforddi ar gyfer Aelodau am 2014/15 fel y nodwyd hynny yn Atodiad 1 yr adroddiad.

Cwestiwn Cynghorydd Jeff Evans:-

Hoffwn ofyn y cwestiwn isod  dan reol i Cynghorydd R Dew, Aelod Portffolio Eiddo:-

 “Faint o fusnesau/sefydliadau sydd ar hyn o bryd yn cael £500 am ddarparu cyfleusterau toiled.  Lle mae’r rhain a beth yw cyfanswm cost y ddarpariaeth?”

Gofynnwyd y cwestiwn isod y cafwyd rhybudd ohono gan Jeff Evans i’r Cynghorydd Richard Dew, yr Aelod Portffolio ar gyfer Priffyrdd, Eiddo a Rheoli Gwastraff:

“Faint o fusnesau/sefydliadau sydd ar hyn o bryd yn derbyn £500 am ddarparu cyfleusterau toiled?  Ble mae’r rhain a beth yw cyfanswm cost y ddarpariaeth.”

Mewn ymateb, dywedodd yr Aelod Portffolio ar gyfer Priffyrdd, Eiddo a Rheoli Gwastraff, fod 31 o fusnesau wedi derbyn grant £500 yn ystod y flwyddyn ariannol ddiwethaf,  2013/14, cyfanswm o £15,500. Roedd y busnesau hyn wedi eu lleoli ar hyd a lled yr ynys gyda thraean ohonynt yng Nghaergybi. Yn 2013/14, cafodd y gwasanaeth y cymorth ariannol ar gyfer y grant yn uniongyrchol gan Lywodraeth Cymru. Eleni, ni fydd y grant yn cael ei dalu’n uniongyrchol, yn hytrach, bydd y Cyngor yn ei dderbyn yn y Grant Cymorth Refeniw. Mae’r Adran yn disgwyl derbyn o leiaf £15,000 o’r GCR i barhau gyda’r cynllun grant eleni ac mae’r rhestr o’r sefydliadau a gymeradwywyd wrthi’n cael ei llunio a chyda gobaith, bydd wedi’i chwblhau erbyn yr wythnos nesaf gyda ffigyrau tebyg eto, h.y. 30 neu fwy o sefydliadau. Er gwybodaeth bellach, i gael eu cynnwys yn y cynllun, rhaid i bob busnes  fod ar agor ar amseroedd rhesymol, darparu mynediad i’r anabl ac arddangos poster A4 yn hysbyebu’r ffaith fod y cyfleusterau toiled ar gael i’r cyhoedd eu defnyddio.

Fel cwestiwn atodol, gofynnodd y Cynghorydd Jeff Evans a fyddai’r Aelod Portffolio ar gyfer Priffyrdd, Eiddo a Rheoli Gwastraff yn mofyn sicrwydd gan yr Adain Rheoli Gwastraff bod y cynllun grantiau toiledau’n cael ei weithredu ar unwaith oherwydd roedd ar ddeall nad oedd unrhyw fusnesau wedi tanysgrifio i’r cynllun hyd yma ac nad oedd unrhyw gyllid wedi’i ryddhau ac y dylid clustnodi’r cyllid i’r Adain Rheoli Gwastraff. 

Dywedodd yr Aelod Portffolio ar gyfer Priffyrdd, Eiddo a Rheoli Gwastraff bod y rhan fwyaf o’r busnesau a oedd yn rhan o’r cynllun llynedd wedi penderfynu cario ymlaen yn wirfoddol hyd oni wyddys beth fydd canlyniad cytundeb eleni.  Mae gwaith yn mynd rhagddo ers derbyn y grant a chyda gobaith, bydd y rhain yn cael eu cymeradwyo yr wythnos nesaf. 

Cyflwyno Rhybudd o Gynnig gan y Cynghorydd R Meirion Jones yn unol â Rheol 4.1.13.1 ac  4.1.17.1 o’r Cyfansoddiad. Mae’r Rhybudd wedi’i arwyddo gan y Cynghorwyr Bob Parry, OBE, Dylan Rees, Nicola Roberts, Carwyn Jones, Llinos Medi Huws, John W Griffith, T Lloyd Hughes, A W Mummery, Ann Griffith ac Vaughan Hughes.

·                    Ail-ystyried amseroedd cyfarfodydd y Cyngor Sir, Pwyllgor Gwaith, Pwyllgorau Craffu, Pwyllgorau Lled-farnwrol a phob Pwyllgor neu Is-Bwyllgor arall o’r Cyngor Sir a rhoi sylw anghenion cydraddoldeb, cyfartalwch ac amrywiaeth.

·                    Trosglwyddo ystyriaeth o amseroedd cyfarfodydd i’r cyfarfod nesaf o’r         Pwyllgor Gwasanaethau Democrataidd. 

      I roi ystyriaeth i’r uchod.

           Cyflwynwyd y Rhybudd o Gynigiad isod gan y Cynghorydd R Meirion Jones yn unol â Rheolau 4.1.13.1 a 4.1.17.1 y Cyfansoddiad wedi ei lofnodi gan y Cynghorwyr Bob Parry OBE, Dylan Rees, Nicola Roberts, Carwyn Jones, Llinos Medi Huws, John W Griffith, T Lloyd Hughes, A W Mummery, Ann Griffith a Vaughan Hughes.

·        “Ailystyried amseroedd cyfarfodydd y Cyngor Sir, Pwyllgor Gwaith, Pwyllgorau Sgriwtini, Pwyllgorau Lled-farnwrol a holl Bwyllgorau ac Is-bwyllgorau eraill y Cyngor a rhoi sylw i’r gofynion o ran cydraddoldeb ac amrywiaeth.

·        Cyfeirio’r mater i’r cyfarfod nesaf o’r Pwyllgor Gwasanaethau Democrataidd”.

Siaradodd y Cynghorydd R Meirion Jones ar y cynnig.

Penderfynwyd cyfeirio’r mater i’r cyfarfod nesaf o’r Pwyllgor Gwasanaethau Democrataidd.

Ystyried mabwysiadu’r canlynol:-

“Dan Adran 100 (A)(4) Ddeddf Llywodraeth Leol 1972, i gau’r wasg a'r cyhoedd allan o'r cyfarfod yn ystod y drafodaeth ar yr eitem a ganlyn, oherwydd y tebygrwydd y câi gwybodaeth ei rhyddhau a honno'n wybodaeth eithriedig fel â ddiffinnir yn Atodlen 12A y Ddeddf ac yn y Prawf Budd y Cyhoedd sydd ynghlwm”.

Trafodwyd a phenderfynwyd –

Dan Adran 100(A)(4) Deddf Llywodraeth Leol 1972, gyrru’r wasg a’r cyhoedd o’r cyfarfod yn ystod y drafodaeth ar yr eitem isod oherwydd y tebygrwydd y câi gwybodaeth ei rhyddhau a honno’n wybodaeth y gwneir eithriad ohoni Yn Atodlen 12A y Ddeddf ac yn y Prawf Budd y Cyhoedd sydd ynghlwm.

Cyflwyno adroddiad gan y Swyddog Monitro ar gynnwys y cais.

Cyflwynwyd adroddiad y Swyddog Monitro ar gynnwys y cais.

Penderfynwyd, i bwrpas Adran 85 Deddf Llywodraeth Leol 1972, i dderbyn gwaeledd y cynghorydd fel y rheswm am iddo fethu â mynychu cyfarfodydd ac i ganiatáu ei absenoldeb o holl gyfarfodydd y Cyngor neu Bwyllgorau am gyfnod ychwanegol o 6 mis o 11 Mehefin 2014 hyd 11 Rhagfyr 2014.