Rhaglen a chofnodion

Dywedodd y Prif Weithredwr bod y cyfarfod arbennig hwn o’r Cyngor wedi ei alw gan Gadeirydd y Cyngor o dan ddarpariaethau’r Cyfansoddiad, yn dilyn cael cadarnhad gan Lywodraeth Cymru o gyllid Grant Tai Cymdeithasol ychwanegol ar gyfer datblygu 10 o gartrefi ar safle oedd ym mherchnogaeth y Cyngor ger Bryn Paun, Llangoed.  Roedd y cyllid ychwanegol hwn wedi ei ddyrannu ar ddiwedd y flwyddyn ariannol a rhaid ei hawlio cyn 31 Mawrth 2015 ar yr hwyraf.

Derbyn unrhyw ddatganiad o ddiddordeb gan unrhyw Aelod neu Swyddog yng nghyswllt unrhyw eitem o fusnes.

Ceisiodd y Cynghorydd Lewis Davies gael eglurhad a oedd angen iddo ddatgan diddordeb yn y mater oherwydd iddo fod yn gysylltiedig â datblygiad Bryn Paun fel Aelod Lleol.

Cadarnhaodd y Swyddog Monitro nad oedd ei ymwneud yn y capasiti hwnnw yn creu diddordeb.

Ni dderbyniwyd unrhyw ddatganiad arall o ddiddordeb.

Ystyried mabwysiadu'r canlynol:-

"Dan Adran 100 (A)(4) Deddf Llywodraeth Leol 1972, cau allan y wasg a'r cyhoedd o'r cyfarfod yn ystod y drafodaeth ar yr eitemau a ganlyn, oherwydd y posibilrwydd y caiff gwybodaeth eithriedig ei rhyddhau fel y diffinnir hi yn Atodlen 12A y Ddeddf a'r Prawf Budd y Cyhoedd sydd ynghlwm".

Penderfynwyd dan Adran 100 (A)(4) Ddeddf Llywodraeth Leol 1972, gyrrwyd y wasg a'r cyhoedd allan o'r cyfarfod yn ystod y drafodaeth ar yr eitem a ganlyn, oherwydd y tebygrwydd y câi gwybodaeth ei rhyddhau a honno'n wybodaeth y gwna Atodlen 12A y Ddeddf eithriad ohoni fel y diffinnir y wybodaeth yn y Ddeddf ac yn y Prawf Budd y Cyhoedd sydd ynghlwm.

Cyflwyno adroddiad gan y Pennaeth Gwasanaeth Tai.

Cyflwynwyd er ystyriaeth y Cyngor adroddiad Pennaeth y Gwasanaethau Tai oedd yn egluro’r cefndir gyda nodi Bryn Paun, Llangoed fel safle datblygu tai cymdeithasol tebygol a’r ystyriaethau oedd ynglŷn â hyrwyddo’r safle.

Cadarnhaodd y Deilydd Portffolio Tai a Gwasanaethau Cymdeithasol lwyddiant y Cyngor yn sicrhau cyllid grant Tai Cymdeithasol ychwanegol gan Lywodraeth Cymru a chyfeiriodd at yr argymhellion yn yr adroddiad i symud ymlaen gyda’r mater hwn.

Dywedodd y Pennaeth Gwasanaethau Tai mai’r amcan gwreiddiol i’r safle yn 2012 oedd gweithredu cynnig i gyfarfod â’r anghenion am dai fforddiadwy mewn cymunedau drwy ddatblygu model lle mae gwerth y tir yn cael ei ddefnyddio fel yn nawdd i sicrhau fforddiadwyaeth.  Roedd y Galluogwr Tai Gwledig wedi nodi’r angen am dai fforddiadwy yn Llangoed ac roedd hwnnw wedi’i gefnogi gan y Cyngor Cymuned gyda safle datblygu tebygol yn gyfagos i Bryn Paun oedd ym mherchnogaeth y Gwasanaethau Tai wedi ei nodi.  Dewisiwyd North Wales Housing i weithio mewn partneriaeth â’r Gwasanaethau Tai i ddatblygu’r cynllun. Cyfeiriodd y Swyddog at faterion y bu’n rhaid rhoi sylw iddynt yn y tair blynedd diwethaf a chadarnhaodd bod bwriadau ar gyfer datblygiad ymarferol o 10 cartref wedi ei gynllunio gan North Wales Housing mewn partneriaeth â’r Gwasanaethau Tai.  Cafwyd cytundeb ynglŷn â gosodiad y datblygiad a chafwyd caniatâd cynllunio llawn.  Blaenoriaethwyd y cynllun ar gyfer bid grant tai cymdeithasol ychwanegol oherwydd yn dilyn cael caniatâd cynllunio llawn a chytundeb ar gostau datblygu roedd yn barod i’w ddechrau ac roedd yn gymwys i’w ystyried.  Mae dyfarnu’r dyraniad ychwanegol hwn yn ei gwneud yn bosibl i ni ddatblygu’r cartrefi hyn y mae mawr alw amdanynt fel bonws i’r dyraniad grant blynyddol sydd wedi bod yn gostwng dros y blynyddoedd diwethaf.  Cyfeiriodd y Swyddog at yr ystyriaethau ariannol oedd ynglŷn â’r cynllun a chadarnhaodd bod adroddiad prisio annibynnol ar werth y tir wedi’i dderbyn ers y cafodd yr adroddiad hwn ei ddrafftio.

Roedd y Cynghorydd Lewis Davies ac Alwyn Rowlands fel Aelodau Lleol yn croesawu’r dyraniad cyllid grant ychwanegol ac yn cydnabod y gwaith a’r ymdrechion oedd wedi’u gwneud i ddod â’r cynllun i rym.

Penderfynwyd yn unfrydol -

•  I werthu safle Cyfrif Refeniw Tai yn gyfagos i Bryn Paun, Llangoed i North Wales Housing ar bris oedd yn adlewyrchu pwrpasau tai cymdeithasol, fydd yn cael ei dystiolaethu drwy adroddiad prisio annibynnol.

•  I gymeradwyo gwerthu’r safle i North Wales Housing ar gyfer datblygu 10 o gartrefi rhent tai cymdeithasol oherwydd i’r grant Tai Cymdeithasol ychwanegol ddod ar gael.