Rhaglen, Penderfyniadau a Chofnodion.

Derbyn unrhyw ddatganiad o ddiddordeb gan unrhyw Aelod neu swyddog parthed unrhyw eitem o fusnes.

Ni dderbyniwyd yr un datganiad o ddiddordeb.

Cyflwyno adroddiad gan y Pennaeth Gwasanaethau Tai mewn perthynas â’r uchod.

Cyflwynwyd - adroddiad y Pennaeth Gwasanaeth Tai mewn perthynas â'r uchod.

Dywedodd yr Aelod Portffolio (Tai a Gwasanaethau Cymdeithasol) fod Llywodraeth Cymru yn rhoi dyletswydd statudol ar awdurdodau lleol i gynnwys safle parhaol a dau safle dros dro yn eu Cynlluniau Datblygu Lleol ar y Cyd fel darpar safleoedd. Dywedodd y cynhaliwyd  cyfnod o ymgynghori ar y tri safle a nodwyd, gan gynnwys digwyddiadau Galw i Mewn a chyfarfodydd gyda Chynghorau Cymuned ar gyfer yr ardaloedd lle gallai’r safleoedd gael eu lleoli.

Eglurodd y Prif Weithredwr Cynorthwyol (Llywodraethiant a Thrawsnewid Prosesau Busnes) ei fod yn glir bod angen Mannau Aros Dros Dro yn Ynys Môn ac roedd y gwersylloedd anawdurdodedig a sefydlwyd yn rheolaidd gan Sipsiwn Romani ar Ynys Môn ers nifer o flynyddoedd yn tystio i hynny. Dywedodd fod tri safle yn cael eu hystyried: -

Safle 1 - Llain o dir rhwng yr A55 / A5 rhwng Llanfairpwll a Chroesffordd Star;
Safle 2 - Tir ar fân-ddaliad yn y Gaerwen;
Safle 3 - Tir ger yr A5 wrth Fferm Cymunod, Bryngwran.

Yn dilyn ymgynghoriad helaeth fel y nodwyd gan yr Aelod Portffolio, nododd yr ystyrir bod y safle ym Mryngwran yn anaddas oherwydd materion nad oedd modd eu goresgyn a godwyd gan yr Awdurdod Priffyrdd ynglŷn â'r ffaith nad yw’r fynedfa i'r safle yn cwrdd â  gofynion diogelwch sylfaenol o ran gwelededd. ‘Roedd safleoedd 1 a 2 ar ôl i’w hystyried fel mannau aros dros dro ar gyfer Sipsiwn a Theithwyr. Mae llai o bryderon technegol am y safle ar Groesfordd Star, ac mae’r adroddiad gan Wasanaeth Archeolegol Gwynedd yn codi cwestiynau am addasrwydd y safle yn y Gaerwen a gall gymryd amser i'w datrys. Fodd bynnag, os ystyrir y dylid ymchwilio ymhellach i’r safle yn y Gaerwen, dywedodd y byddai angen gwneud gwaith pellach mewn perthynas â'r safle o ran y materion archeolegol sy'n gysylltiedig â’r heneb. Bydd angen cynnal asesiad risg ar gyfer y ddau safle mewn perthynas â materion technegol, dyluniad y safleoedd a materion iechyd a diogelwch. Bydd angen penodi Ymgynghorydd priodol i baratoi dyluniad y safleoedd i ganiatáu ar gyfer costio cynllun o’r fath, a byddai hynny’n golygu y gellid cyfrifo’r costau. Nododd y byddai’n haws darparu safle addas yn Star o fewn amserlen resymol, ond y gellid cynnal astudiaethau pellach ar y naill safle neu'r llall, neu’r ddau yn y Gaerwen a Star a bod y penderfyniad yn un i’r Pwyllgor Gwaith ei wneud.

Dywedodd y Prif Weithredwr Cynorthwyol (Llywodraethiant a Thrawsnewid Prosesau Busnes) y cafwyd trafodaethau gyda swyddogion o'r Adrannau Cynllunio a Thai yn Llywodraeth Cymru; maent yn ymwybodol o'r gwaith sydd wedi cael ei wneud i nodi safleoedd addas ar gyfer mannau aros dros dro, ac maent yn ymwybodol y bydd angen gwneud gwaith pellach i gadarnhau addasrwydd naill ai Star neu Gaerwen cyn y gellir eu cynnwys yn y Cynllun Datblygu Lleol ar y Cyd; deallir bod Llywodraeth Cymru yn cefnogi’r  cynnydd a wnaed hyd yma. 

Dywedwyd bod y Pwyllgor Sgriwtini Partneriaethau ac Adfywio a gynhaliwyd ar 19  ...  Gweld y Cofnodion llawn ar gyfer eitem 2.

Cyflwyno adroddiad gan y Pennaeth Gwasanaethau Tai mewn perthynas â’r uchod.

Cyflwynwyd - adroddiad y Pennaeth Gwasanaeth Tai mewn perthynas â'r uchod.

Dywedodd Yr Aelod Portffolio (Tai a Gwasanaethau Cymdeithasol) fod y Cyngor wedi  ymgynghori ynghylch dau safle a nodwyd yn Fferm Tyddyn Lantern, Caergybi a Hen fferm oddi ar Ffordd Cyttir, Caergybi.

Nododd y Prif Weithredwr Cynorthwyol (Llywodraethiant a Thrawsnewid Prosesau Busnes)  yr ystyrir nad yw’r un o’r ddau safle yn addas i’w clustnodi fel mannau aros dros dro ar gyfer Sipsiwn a Theithwyr yn dilyn y broses ymgynghori. Mae angen dod o hyd i ddatrysiad tymor byr yng Nghaergybi drwy osod biniau i leihau gwastraff domestig a gwastraff anghyfreithlon mewn lleoliadau yng Nghaergybi lle mae’n ymddangos bod teithwyr yn gwersylla arnynt heb ganiatâd.  Dywedodd y bydd angen gwneud rhagor o ymchwiliadau i gwrdd ag anghenion teithwyr sy'n teithio i Iwerddon ac i fesur y defnydd a wneir o'r Porthladd gan Sipsiwn a Theithwyr. Oherwydd diffyg tir mewn perchnogaeth gyhoeddus yng Nghaergybi, bydd angen cynnal trafodaethau gyda pherchnogion tir sector preifat er mwyn nodi tir addas fel Man Aros Dros Dro ar gyfer y Teithwyr Gwyddelig sy'n aros yn achlysurol yng Nghaergybi ar eu ffordd i’r porthladd ac oddi yno.

PENDERFYNWYD:-

·           Na ddylid bwrw ymlaen gyda’r naill na'r llall o'r ddau safle a gafodd eu cynnwys yn yr ymgynghoriad fel man  aros dros dro yng nghyffiniau Caergybi ac na ddylid cynnwys yr un ohonynt yn y Cynllun Datblygu Lleol.

·           Dylid gwneud gwaith pellach i ddod o hyd i safleoedd amgen i gwrdd â'r angen am le aros dros dro yn ardal Caergybi fel y nodir yn yr Asesiad o Anghenion Llety Sipsiwn a Theithwyr a gynhaliwyd gan y Cyngor yn 2016 er mwyn cydymffurfio â dyletswyddau’r Cyngor o dan Ran 3 o Ddeddf Tai (Cymru) 2014.

·           Dylid gwneud gwaith pellach i ddeall yn well faint o ddefnydd a wneir o borthladd Caergybi gan Sipsiwn a Theithwyr a nifer y gwersylloedd

anawdurdodedig sy’n digwydd o ganlyniad i deithio i’r Porthladd ac oddi yno. Hyn i gynnwys trafodaethau pellach gyda'r Heddlu, Awdurdodau Porthladd, Llywodraeth Cymru a chydranddeiliaid allweddol eraill.

·           Fel datrysiad tymor byr, ystyried gosod biniau mewn lleoliad addas i ostwng nifer yr achosion o adael gwastraff domestig yn anghyfreithlon a oedd yn gysylltiedig â gwersylloedd anawdurdodedig yng Nghaergybi.

·           Yr Awdurdod i barhau i gyflawni ei rôl i hyrwyddo cydlyniant cymunedol. Rhaid i hyn gydbwyso anghenion cymunedau lleol a Sipsiwn a Theithwyr sy’n ymweld er mwyn iddynt deimlo'n ddiogel, a dylid ymgynghori â nhw ar faterion datblygu, gan gydnabod bod yn rhaid i'r Cyngor weithredu yn erbyn agweddau hiliol a herio sylwadau ymfflamychol.

Cyflwyno adroddiad gan y Pennaeth Gwasanaethau Plant.

Cyflwynwyd - adroddiad y Pennaeth Gwasanaethau Plant mewn perthynas â'r uchod.

Dywedodd yr Aelod Portffolio (Tai a Gwasanaethau Cymdeithasol) fod Deddf Gwasanaethau Cymdeithasol a Llesiant (Cymru) 2014 yn rhoi dyletswydd glir ar Awdurdodau Lleol i sicrhau llesiant plant trwy fabwysiadu dull ataliol o weithredu er mwyn lleihau'r angen iddynt dderbyn gofal.

Dywedodd Pennaeth y Gwasanaethau Plant fod Timau Trothwy Gofal mewn awdurdodau lleol eraill yng Nghymru a Lloegr wedi dangos llwyddiant wrth gefnogi teuluoedd i fedru magu eu plant o fewn y teulu yn hytrach nag o fewn y system ofal. Nododd bod cyfran sylweddol o gyllideb y gwasanaeth yn cael ei gwario ar nifer gynyddol o blant sy'n derbyn gofal, er nad yw hynny o reidrwydd yn cyflawni'r canlyniadau gorau ar eu cyfer. Mae angen sefydlu ffordd arloesol i wella ac ailgynllunio’r ddarpariaeth gwasanaeth i sicrhau ansawdd uwch trwy Dîm Trothwy Gofal. 

PENDERFYNWYD:-

·           Rhyddhau cyllid o arian wrth gefn cyffredinol y Cyngor ar gyfer 2016/17 er mwyn ariannu costau’r Tîm Trothwy Gofal.

·           Cymeradwyo bod cyllid ar gyfer y ddwy flynedd ddilynol yn cael ei gynnwys yng nghyllideb y gwasanaeth am y ddwy flynedd.