Rhaglen, Penderfyniadau a Chofnodion.

Fel y nodir uchod.

Derbyn unrhyw ddatganiad o ddiddordeb gan unrhyw Aelod neu Swyddog parthed unrhyw eitem o fusnes.

Gwnaeth y Cynghorydd Euryn Morris ddatgan diddordeb personol mewn perthynas ag Eitem 5, gan ei fod yn cael ei gyflogi gan Gyngor Gwynedd.

Cyflwno, i’w cadarnhau, gofnodion y cyfarfodydd canlynol :-

·       Cofnodion y cyfarfod a gynhaliwyd ar 13 Tachwedd, 2025;

·       Cofnodion y cyfarfod a gynhaliwyd ar 26 Tachwedd, 2025;

·       Cofnodion y cyfarfod arbennig a gynhaliwyd ar 10 Rhagfyr, 2025.

Cadarnhawyd bod cofnodion y cyfarfodydd canlynol yn gofnod cywir:-

·             Cofnodion y cyfarfod hybrid a gynhaliwyd ar 13 Tachwedd, 2025.

·             Cofnodion y cyfarfod a gynhaliwyd ar 26, Tachwedd, 2025, yn amodol ar gynnwys enw’r cynghorydd Sonia Williams i’r rhestr o ymddiheuriadau.

Camau gweithredu’n codi o’r cyfarfod a gynhaliwyd ar 26 Tachwedd, 2025:-

·       CAM 1 - Data am nifer y galwadau mae’r Gwasanaeth Ambiwlans yng Ngogledd Orllewin Cymru yn eu derbyn mewn perthynas ag argyfyngau iechyd meddwl.

Darparwyd data gan Wasanaeth Ambiwlans Cymru i Aelodau’r Pwyllgor dros neges e-bost cyn y Nadolig.

·       CAM 2 - Bydd trafodaethau’n digwydd rhwng Gwasanaeth Ambiwlans Cymru a Phrif Swyddog Gwasanaeth Tân ac Achub Gogledd Cymru ynghyd â’r Grŵp Gwasanaethau Brys ar y Cyd i ailasesu ac ailystyried y cymorth ar gyfer y Gwasanaeth Tân ac Achub o ran cwympiadau.

Sicrhawyd fod Gwasanaeth Ambiwlans Cymru wedi cysylltu â Phrif Swyddog Gwasanaeth Tân ac Achub Gogledd Cymru a bod trafodaethau cychwynnol wedi dechrau.  Bydd y mater hefyd yn cael ei godi yng nghyfarfod nesaf y Grŵp Gwasanaethau Brys ar y Cyd.

·     CAM 3 - Codwyd materion am y mesurau y’u cymerir mewn perthynas â therapi ac asesiadau ar gyfer plant gydag anghenion dysgu ychwanegol ar Ynys Môn, a pha ddarpariaeth sydd ar waith i leihau amseroedd aros. 

·     CAM 4 - Codwyd materion am y gwaith a wnaed gan y Bwrdd Iechyd ac asiantaethau eraill er mwyn mynd i’r afael â’r defnydd o cetamin. 

Derbyniodd aelodau’r Pwyllgor fanylion ar ffurf neges e-bost am Gam 3 a 4 uchod.

·             Cofnodion y cyfarfod hybrid a gynhaliwyd ar 10 Rhagfyr, 2025.

Cyflwyno adroddiad gan y Cyfarwyddwr Gwasanaethau Cymdeithasol.

Cyflwynwyd adroddiad y Cyfarwyddwr Gwasanaethau Cymdeithasol i’w ystyried gan y Pwyllgor.

Dywedodd yr Aelod Portffolio Plant, Pobl Ifanc a Theuluoedd fod diogelu yn gyfrifoldeb i bawb o fewn gwasanaethau’r Cyngor, ac mae gan staff, contractwyr, gwirfoddolwyr ac Aelodau Etholedig rôl i’w chwarae o ran diogelu plant ac oedolion bregus rhag niwed, boed hynny y tu allan neu y tu mewn i’w cartrefi.   Dywedodd mai un o’r prif weithredoedd yn dilyn cyfarfod y pwyllgor sgriwtini ym mis Ionawr 2025 oedd adolygu Cylch Gorchwyl y Bwrdd Cyflawni Diogelu Corfforaethol a’r Bwrdd Diogelu Corfforaethol.  Mae’r gwaith hwn bellach wedi’i gwblhau, ac mae’r Cylch Gorchwyl diwygiedig wedi’i gymeradwyo’n ffurfiol gan y Bwrdd Diogelu Corfforaethol.  Mae’r newidiadau hyn yn cryfhau trefniadau llywodraethu, egluro atebolrwydd ac yn sicrhau bod cyfrifoldebau diogelu’n cael eu gwreiddio’n gyson o fewn y Cyngor.  Mae’r Bwrdd Cyflawni Diogelu Corfforaethol wedi ehangu ei aelodaeth dros y flwyddyn ddiwethaf, ac mae hyn wedi gwella ymgysylltiad ar draws adrannau ac wedi creu brwdfrydedd wrth yrru cyfrifoldebau diogelu ymlaen ar draws y Cyngor.  Dywedodd fod diogelu’n parhau i gael ei adnabod fel y trydydd risg mwyaf i’r Cyngor.  Ers cyhoeddi Cyfiawnder trwy ein Dewrder, mae’r Cyngor, a’r Gwasanaethau Cymdeithasol ac Addysg yn arbennig, wedi bod yn gweithio’n agos â Bwrdd Diogelu Gogledd Cymru er mwyn dangos sut mae’r Awdurdod wedi ymateb i argymhellion yr Adolygiad Ymarfer Plant.  Archwiliwyd y gwaith hwn yn fanwl mewn trafodaethau yng nghyd gyfarfod y Panel Sgriwtini Addysg a’r Panel Sgriwtini Gwasanaethau Cymdeithasol ym mis Rhagfyr 2025.  Mae’r Bwrdd Cyflawni Diogelu Corfforaethol yn craffu ar y broses gaffael sy’n ymwneud â chludo plant i’r ysgol ac oddi yno, fel y nodir yn yr adroddiad, ac mae’r gwaith hwn yn ffurfio rhan o waith penodol ehangach i gryfhau prosesau comisiynu diogelu ar draws y Cyngor. 

Roedd yr Aelod Portffolio yn croesawu nad oedd rhaid i Gyngor Sir Ynys Môn gyfeirio unrhyw achosion at Fwrdd Diogelu Gogledd Cymru ar gyfer Adolygiad Diogelu Unedig Sengl yn ystod y 12 mis diwethaf.   Cyfeiriodd at ddatblygiad y gweithlu a hyfforddiant, fel y nodwyd yn yr adroddiad, gan gyfeirio at feysydd sydd angen eu datblygu.  Mae’r prif flaenoriaeth ar gyfer y flwyddyn y ddod yn cynnwys lansio’r Strategaeth Bwrdd Diogelu Corfforaethol pum mlynedd ym mis Ebrill 2026; cryfhau’r gofynion diogelu ar gontractwyr; parhau i ymgorffori diogelu ar draws yr holl gyfundrefnau; gwella cydweithio ar draws asiantaethau ac ymgysylltiad â’r gymuned; gweithredu newyddlen diogelu chwarterol a datblygu a darparu cynllun cyfathrebu newydd ar ddiogelu.  Dywedodd fod y gwaith sydd wedi mynd rhagddo yn ystod y 12 mis diwethaf yn dangos fod cynnydd cryf wedi’i wneud o ran cryfhau trefniadau diogelu o fewn y Cyngor.  Bydd y Bwrdd Cyflawni Diogelu Corfforaethol yn parhau i yrru gwelliannau, sicrhau cydymffurfiaeth â dyletswyddau statudol a hyrwyddo diwylliant lle mae diogelu’n cael ei gydnabod fel cyfrifoldeb i bawb.  Bydd y mater o ran cofnodion hyfforddiant ysgolion yn cael ei drosglwyddo i gyfarfod y Bwrdd Diogelu Corfforaethol ym mis Chwefror. 

Wrth ystyried yr adroddiad, aeth y Pwyllgor ati i drafod y prif faterion canlynol  ...  Gweld y Cofnodion llawn ar gyfer eitem 4.

·       Adroddiad Blynyddol 2024/2025

·       Trefniadau llywodraethiant/craffu cynnydd ar wireddu’r Cynllun Llesiant

Cyflwynwyd Adroddiad Blynyddol 2024/2025, oedd yn ymgorffori trefniadau llywodraethu/craffu er mwyn darparu’r Cynllun Llesiant, i’w Pwyllgor ei ystyried.

Dywedodd y Dirprwy Arweinydd a’r Aelod Portffolio Cyllid, Busnes Corfforaethol a Phrofiad Cwsmer fod y Bwrdd Gwasanaethau Cyhoeddus wedi cyrraedd y drydedd flwyddyn o’r Cynllun Llesiant 5 mlynedd, ac mae mwyafrif yr amcanion un ai wedi’u cwblhau, neu mae cynllun gweithredu ar waith gydag amserlen arfaethedig ar gyfer eu cwblhau.

Dywedodd y Rheolwr Rhaglen - Bwrdd Gwasanaethau Cyhoeddus Gwynedd a Môn fod y Bwrdd wedi datblygu dros y blynyddoedd, ac mae cyfarfodydd yn canolbwyntio mwy ar wneud penderfyniadau a blaenoriaethu gwaith yn hytrach na bod yn fforwm rhannu gwybodaeth, ac mae gan y Bwrdd safbwynt gweithredol gyda sawl enghraifft o bartneriaid yn cydweithio, yn rhannu arfer da, yn dysgu gweri ac yn symud ymlaen gyda’i gilydd.  Sefydlwyd Is-grwpiau gyda Swyddogion yn cydweithio, ac mae hynny wedi ei adnabod fel arfer da ledled Cymru.  Cynhaliwyd gweithdy Gwybodus o Drawma ar gyfer holl aelodau’r Bwrdd, a gafodd ei ddarparu gan arbenigwyr yng Nghyngor Sir Ynys Môn.  Mae’r Is-grŵp Iaith wedi cwblhau’r Prosiect Arferion Recriwtio Da, ac mae’n gweithio gyda phartneriaid ar y ‘Prosiect Chwalu Mythau am Weithio’n Gymraeg’ fydd yn cael ei lansio yn Eisteddfod yr Urdd yn Ynys Môn fis Mai. Mae Comisiynydd Plant Cymru, ar y cyd â Llywodraeth Cymru, wedi cynnig peilota sesiynau penodol ar gyfer partneriaid y Bwrdd Gwasanaethau Cyhoeddus am Siarter Hawliau Plant y Cenhedloedd Unedig.  Dyma gyfle unigryw i Fwrdd Gwasanaethau Cyhoeddus Gwynedd a Môn arwain y ffordd yn ngogledd Cymru, ar y cyd â Chomisiynydd Plant Cymru, er mwyn cynnig y gweithdy hwn. 

Wrth ystyried yr adroddiad, aeth y Pwyllgor ati i drafod y prif faterion canlynol -

·     Cyfeiriwyd at ymgysylltiad y Byrddau gyda ‘Llais y Dysgwr’ a chafwyd trafodaethau gyda Choleg Llandrillo Menai a Choleg Meirion Dwyfor mewn perthynas â materion cludiant i fyfyrwyr allu mynychu’r colegau hyn.  Gofynnwyd sut mae’r Bwrdd yn delio gyda’r mater hwn, ac a fydd yn berthnasol i ysgolion cynradd ac uwchradd.  Dywedodd y Rheolwr Rhaglen - Bwrdd Gwasanaethau Cyhoeddus Gwynedd a Môn fod y mater wedi ei godi yn ystod cyfarfod y Bwrdd Gwasanaethau Cyhoeddus fis Medi 2025, ac roedd Comisiynydd Cenedlaethau'r Dyfodol Cymru yn bresennol yn y cyfarfod hwnnw.  Nododd fod y Comisiynydd Cenedlaethau'r Dyfodol Cymru wedi herio’r Bwrdd er mwyn sicrhau bod lleisiau pobl ifanc yn cael eu clywed, a sut fydd eu lleisiau yn cael eu hadlewyrchu yn y gwaith fydd y Bwrdd yn ei gwblhau.  Bu i Goleg Llandrillo Menai wahodd cynrychiolwyr o’r Bwrdd i siarad gyda myfyrwyr yn y Coleg.  Aeth ymlaen i ddweud y bydd Cyngor Gwynedd yn ymgynghori ar faterion cludiant, a bydd yn adrodd yn ôl i Bwrdd yn fuan.  Dywedodd y Dirprwy Arweinydd a’r Aelod Portffolio Cyllid, Busnes Corfforaethol a Phrofiad Cwsmer ei fod yn bwysig fod aelodau’r Bwrdd yn cael gwybodaeth am yr herio mae myfyrwyr Coleg Llandrillo Menai yn eu hwynebu gyda llwybrau bws a chysylltiadau cludiant. Dywedodd fod y ddolen at rybuddion o dywydd garw wedi ei  ...  Gweld y Cofnodion llawn ar gyfer eitem 5.

Cyflwyno adroddiad gan y Swyddog Sgriwtini.

Cyflwynwyd adroddiad y Swyddog Sgriwtini, oedd yn gosod allan Blaen Rhaglen Waith y Pwyllgor Sgriwtini Partneriaeth ac Adfywio ar gyfer 2025/2026, i’r Pwyllgor ei ystyried.

PENDERFYNWYD:-

·       Cytuno ar fersiwn gyfredol o’r Flaen Raglen Waith ar gyfer 2025/26;

·       Nodi’r cynnydd a wnaed hyd yma o ran gweithredu’r Blaen Raglen Waith.