Eitem Rhaglen

Adroddiad gan y Rheolwr Datblygu Adnoddau Dynol.

Cyflwynwyd adroddiad gan Reolwr Hyfforddi a Datblygu Adnoddau Dynol ar ddarpariaeth hyfforddi a datblygu a gynigwyd i aelodau etholedig yn ystod y flwyddyn ariannol ddiwethaf.

Dywedodd y Rheolwr Hyfforddi a Datblygu fod 37 o gyfleoedd hyfforddi a datblygu wedi'u cynnig i aelodau ers mis Ebrill 2023, a bod 35 aelod wedi mynychu hyfforddiant ar y Cod Ymddygiad. Roedd y ffigurau presenoldeb a gofnodwyd ar gyfer sesiynau hyfforddi gorfodol eraill yn amrywio rhwng 34 ar gyfer Seiberddiogelwch a 26 ar gyfer Iechyd a Diogelwch.  Pwysleisiwyd bod y ffigurau presenoldeb ar gyfer hyfforddiant gorfodol wedi bod yn siomedig, o ystyried bod mwy o bwyslais yn cael ei roi ar fynychu'r sesiynau hyn.  Lleisiwyd pryderon fod diffyg presenoldeb mewn sesiynau hyfforddi yn cael effaith yn ei dro ar ddatblygu aelodau a symud y rhaglen yn ei blaen, oherwydd bydd angen trefnu hyfforddiant pellach, gan roi pwysau ychwanegol ar staff ac adnoddau ariannol y Cyngor.

Dywedodd y Rheolwr Hyfforddi a Datblygu ei bod wedi derbyn cais i deilwra hyfforddiant Llesiant yn benodol ar gyfer anghenion aelodau i fynd i'r afael â meysydd e.e. menopos. Yn dilyn cais i CLlLC, cynigir dau fodiwl pellach i aelodau h.y. Diogelwch Personol i Gynghorwyr a Rheoli Cam-drin a Bygythiadau Ar-lein.

Nodwyd yr ymgynghorwyd â Gwasanaethau Democrataidd ynglŷn â Chynllun Datblygu ar gyfer Arweinwyr Grŵp, mae drafft o'r Cynllun wedi'i gynnwys yn yr adroddiad.  Cynhaliwyd trafodaethau hefyd gyda darparwyr allanol a Chynghorau eraill ar rannu arfer da.

(Ymunodd y Cynghorydd Iorwerth Roberts â'r cyfarfod am 10.20am)

Mynegodd yr aelodau bryder ynghylch y niferoedd isel yn y sesiynau hyfforddi.  Dywedodd y Rheolwr Hyfforddi a Datblygu fod amser y cyfarfodydd yn destun pryder i rai aelodau, er bod yr opsiwn i gynnal sesiynau hyfforddi yn ystod y dydd a'r nos ar gael ar hyn o bryd. Dywedodd mai un opsiwn posibl fyddai cynnal sesiynau hyfforddi rhithwir ar gyfer hyfforddiant cyffredinol. Hefyd trafodwyd yr opsiwn o recordio sesiynau hyfforddi; ni fyddai hyn yn addas ar gyfer hyfforddiant gorfodol, gan fod angen cadarnhau presenoldeb.

Dywedodd y Rheolwr Hyfforddi a Datblygu mai'r nod yw cyhoeddi'r Cynllun Datblygu Aelodau Etholedig ym mis Medi.  Bydd yn ddogfen sy'n cael ei datblygu, a’i hadolygu'n rheolaidd i ystyried anghenion aelodau etholedig.

Awgrymodd yr Is-gadeirydd ei fod yn cyfarfod ag Arweinwyr Grŵp i drafod diffyg presenoldeb mewn sesiynau hyfforddi gorfodol ac i godi ymwybyddiaeth o bwysigrwydd mynychu'r sesiynau hyn.  Dywedodd y Rheolwr Hyfforddi a Datblygu y byddai'n fodlon rhannu enwau'r aelodau hynny nad ydynt wedi mynychu hyfforddiant gorfodol gyda'r Is-gadeirydd.

Dywedodd yr Is-gadeirydd mai’r teimlad yn gyffredinol oedd y dylai Arweinwyr Grŵp ymgymryd â hyfforddiant ar sgiliau hyfforddi. Cyfeiriodd y Rheolwr Hyfforddi a Datblygu at Eitem 3 o'r adroddiad lle mae'n nodi y byddai'r opsiwn hwn yn cael ei gynnwys yn y Cynllun Datblygu 1:1 ar gyfer Arweinwyr Grŵp.

Cyfeiriodd y Swyddog Monitro at hyfforddiant gorfodol ac awgrymodd y byddai'n ddefnyddiol gwybod pa gyrsiau hyfforddi y gellir eu cynnal yn rhithwir neu drwy Bwll Dysgu fel y gellir targedu'r sesiynau hyn ar gyfer aelodau yn y lle cyntaf, gyda sesiynau pellach i ddilyn.

Cadarnhaodd y Rheolwr Hyfforddi a Datblygu fod hyfforddiant ar y Cod Ymddygiad ar gyfer Cynghorwyr Tref a Chymuned yn cael ei drefnu gan ddarparwr allanol.

PENDERFYNWYD: -

•  Nodi cynnwys yr adroddiad.

•  Bod Rheolwr Hyfforddiant a Datblygu AD yn rhannu enwau aelodau sydd heb fynychu hyfforddiant gorfodol gydag Is-gadeirydd y Safonau Pwyllgor.

•  Bod yr Is-gadeirydd yn cyfarfod ag Arweinwyr Grŵp i drafod diffyg presenoldeb mewn hyfforddiant gorfodol gan aelodau o'u grwpiau.

•  Bod y Pwyllgor Safonau yn gofyn i Arweinwyr Grŵp ymgymryd â hyfforddiant ar sgiliau hyfforddi.

Cam Gweithredu: Gweler y penderfyniad uchod