Derbyn unrhyw gyhoeddiadau gan y Cadeirydd, Arweinydd neu’r Prif Weithredwr.
Cofnodion:
Gwnaeth y Cadeirydd y cyhoeddiadau canlynol: -
• Llongyfarchiadau i bawb a drefnodd Sioe Amaethyddol Ynys Môn am sicrhau
blwyddyn lwyddiannus arall, yn ogystal â phawb o'r Ynys a fu'n llwyddiannus
yn y Sioe Frenhinol Brenhinol, Eisteddfod yr Urdd a'r Eisteddfod
Genedlaethol.
• Llongyfarchiadau mawr i'r unigolion o Ynys Môn a gafodd eu hurddo i'r
Orsedd yn ystod Eisteddfod Genedlaethol Wrecsam, gan gynnwys Hywel
Wyn Owen, Mared Lewis, Gwyn Anwyl, Nia Wyn Jones a Rhun ap Iorwerth.
• Llongyfarchiadau i bobl ifanc Ynys Môn ar eu canlyniadau TGAU, Safon Uwch
a lefel 2 a 3 llwyddiannus dros yr haf. Dymunodd y gorau i'r bobl ifanc hynny
a fydd yn gadael i fynd i Brifysgolion. Llongyfarchodd y Cadeirydd hefyd dîm
Plant sy'n Derbyn Gofal y Cyngor ar eu llwyddiant diweddar gyda
chymwysterau TGAU a llwyddiannau eraill. Mynegodd ei diolch i'r holl staff,
athrawon, rhieni a rhieni maeth sydd wedi cefnogi pobl ifanc yn ystod eu
harholiadau.
• Cyfeiriodd y Cadeirydd at gynllun Dyfodol Môn y Cyngor Sir sy'n rhoi cyfle i
raddedigion lleol gwblhau profiad gwaith gwerthfawr o fewn y Cyngor wrth
iddynt weithio tuag at gymhwyster ôl-raddedig. Mae'r Cyngor wedi llwyddo i
benodi pedwar unigolyn graddedig drwy gynllun Dyfodol Môn.
• Cyfeiriodd y Cadeirydd at ddigwyddiad arbennig a gynhaliwyd ym Mona y
penwythnos diwethaf i groesawu Eisteddfod yr Urdd 2026 i'r Ynys.
• Dywedodd y Cadeirydd fod cyfres deledu Rownd a Rownd yn dathlu 30
mlynedd ers iddi gael ei darlledu am y tro cyntaf. Mae'r gyfres, sydd wedi'i
lleoli ym Mhorthaethwy, wedi denu buddsoddiad ariannol sylweddol i'r ardal
dros y blynyddoedd, ac mae mwy na 100 o bobl bellach yn gweithio ar y
rhaglen.
• Llongyfarchiadau i fusnesau ar yr Ynys sydd wedi ennill gwobrau yn
ddiweddar. Enillodd Bragdy Cybi a'r cwmni cynhyrchu mêl, Anglesey Bees,
sêr yng Ngwobrau'r Great Taste, ac enillodd Distyllfa Llanfairpwll wobr y
cynhyrchydd diodydd bach gorau yng Ngwobrau Bwyd a Diod Cymru.
Ar ran y Cyngor Sir, diolchodd y Cadeirydd i'r Gwasanaeth Tân am eu gwaith yn rheoli ac ymladd tanau ar Fynydd Bodafon yn ystod yr haf. Ar un adeg, roedd y tân wedi lledaenu i 1,500 metr sgwâr ond diolch byth chafodd neb ei anafu yn ystod y digwyddiad.
Cyfeiriodd y Cadeirydd at ddigwyddiad arbennig a gynhaliwyd yn gynharach y mis hwn gyda phartneriaid a rhanddeiliaid allweddol i ddathlu taith y Cyngor Sir i ddod yn Ynys sy'n Ystyriol o Drawma. Un o'r uchafbwyntiau oedd enwi Ysgol Gyfun Llangefni fel yr ysgol uwchradd brif ffrwd gyntaf yn y Deyrnas Unedig i dderbyn y wobr Ystyriol o Drawma ac Iechyd Meddwl gan Trauma Informed Schools UK.
Cyfeiriodd y Cadeirydd at ddigwyddiad ar 15 Awst, pan ddaeth y Cyngor Sir a Swyddogion RAF y Fali at ei gilydd i goffáu 80 mlynedd ers Diwrnod VJ. Cynhaliwyd seremoni i godi’r faner y tu allan i Swyddfeydd y Cyngor yn Llangefni. Roedd nifer yn bresennol hefyd yn y digwyddiad cofio a drefnwyd gan y Cynghorydd Aled Morris Jones ym Mynydd Parys gyda'r nos. Roedd y ddau ddigwyddiad, yn ogystal â'r digwyddiad Diwrnod VE ym mis Mai, yn gyfleoedd i gofio'r genhedlaeth a aberthodd gymaint, fel y gallwn fwynhau ein rhyddid heddiw.
* * * *
Cydymdeimlwyd â theulu'r cyn-Gynghorydd Sir Mr Derlwyn Hughes a fu farw'n ddiweddar.
Estynnwyd cydymdeimlad i unrhyw Aelod o'r Cyngor a'r Staff a oedd wedi cael profedigaeth. Safodd Aelodau a Swyddogion mewn tawelwch i dalu teyrnged.