Eitem Rhaglen

Derbyn cyflwyniad gan Grwp Llandrillo Menai.

Croesawodd y Cadeirydd Mr Aled Jones-Griffith, Prif Weithredwr Grŵp Llandrillo Menai i’r cyfarfod.

Cafwyd cyflwyniad yn ystod y cyfarfod gan Mr Aled Jones-Griffith, Prif Weithredwr Grŵp Llandrillo Menai yn amlinellu gwaith a wnaed gan y coleg drwy drefniadau cydweithio gyda’r awdurdod lleol i ddarparu prosiectau arloesol ar yr Ynys.  Atodwyd copi o’r cyflwyniad i agenda’r cyfarfod hwn.

Yn dilyn y cyflwyniad, codwyd y pwyntiau trafod a ganlyn gan y Pwyllgor:

·         Nodwyd bod diffyg crefftwyr yn y diwydiant adeiladu.  Gofynnwyd gwestiynau am gyfanswm y bobl ifanc sy’n mynychu cyrsiau adeiladu yn y Coleg, ac a oes unrhyw enethod yn dangos diddordeb yn y cwrs.  Dywedodd Mr Jones-Griffith fod gostyngiad wedi bod yn nifer y myfyrwyr sy’n dilyn cyrsiau adeiladu yn y Coleg, gan ei bod yn heriol cael prentisiaethau ar gyfer y bobl ifanc hyn.  Dywedodd fod denu genethod i’r diwydiant yn her. Cynigiwyd cwrs STEM gyfochr â chwrs adeiladu ychydig flynyddoedd yn ôl gyda chefnogaeth yr awdurdod lleol.  Dywedodd y byddai’n rhannu niferoedd y bobl sy’n dilyn cyrsiau adeiladu i aelodau’n fuan.  Gofynnwyd cwestiynau pellach ynghylch a yw Grŵp Llandrillo Menai yn mynychu ysgolion uwchradd i dynnu sylw at y cwrs adeiladu sydd ar gael.  Dywedodd Mr Jones-Griffith fod trafodaethau’n mynd rhagddynt gyda’r awdurdod lleol a Chonsortia Addysgiadol Gwynedd a Môn, mewn perthynas â darpariaeth 14 i 16.  Cyfeiriodd at y Dystysgrif Alwedigaethol fydd ar gael yn 2027, fydd yn galluogi myfyrwyr i astudio pynciau galwedigaethol ynghyd â TGAU.  Nododd fod y cyfleusterau ar gael yn y Coleg heb i ysgolion uwchradd orfod buddsoddi mewn darpariaeth o’r fath. 

·         Gofynnwyd cwestiynau am weledigaeth Grŵp Llandrillo Menai mewn perthynas ag addysg ôl-16 ar Ynys Môn. Dywedodd Mr Jones-Griffith fod trafodaethau’n parhau gyda’r awdurdod lleol i sicrhau fod mynediad at gyrsiau galwedigaethol, lefel A a phrentisiaethau yn y Coleg.   Nododd fod modelau gwahanol mewn perthynas ag addysg ôl-16 ledled y wlad, gyda nifer o opsiynau ar gael.  Mae nifer o gyrsiau lefel A ar gael ar gampws Llangefni ar gyfer myfyrwyr, gyda’r mwyafrif yn cael eu darparu drwy’r Gymraeg.  Gofynnwyd cwestiynau pellach ynghylch canran y bobl ifanc sy’n dilyn cyrsiau lefel ‘A’ yng Ngholeg Menai ac a all y Coleg fod yn gyfrifol am ddarparu addysg ôl-16 ar Ynys Môn.  Dywedodd Mr Jones-Griffith fod 30 myfyriwr yn astudio cyrsiau UG a bod 20 myfyriwr yn astudio cyrsiau lefel A yn Coleg Menai eleni.   Dywedodd bod lle ar gyfer cyfleuster addysg ôl-16 ar gampws Coleg Menai, Llangefni a byddai Grŵp Llandrillo Menai’n barod i drafod unrhyw opsiynau eraill pe byddai darpariaeth bellach yn dod i’r Ynys.  Gall y Coleg gynnig astudiaethau galwedigaethol ynghyd â chyrsiau lefel A i fyfyrwyr.

·         Cyfeiriwyd at safle Wylfa a’r posibilrwydd am gyfleoedd gwaith os gwneir cyhoeddiad y bydd darpariaeth niwclear ar y safle.  Nodwyd bod Rolls-Royce, y partner a ffafrir ar gyfer SMRau posibl ar y safle, wedi dweud y byddant yn hyfforddi gweithwyr posibl yn fewnol yn hytrach na’u hyfforddi mewn Colegau lleol.  Dywedodd Mr Jones-Griffith fod trafodaethau wedi bod yn mynd rhagddynt gyda Rolls-Royce yn pwysleisio’r angen i ddarparu cyfleoedd hyfforddiant yn lleol drwy Brifysgol Bangor a Grŵp Llandrillo Menai. 

·         Cyfeiriwyd at ddarparu hyfforddiant yn Gymraeg i bobl ifanc mewn perthynas â chyfleoedd gwaith lleol posibl.  Nodwyd y bydd hyn yn cefnogi pobl ifanc lleol i aros ar yr Ynys.  Gofynnwyd cwestiynau ynghylch faint o amser a gymerir i hyfforddi pobl ar gyfer y swyddi posibl hyn.  Dywedodd Mr Jones-Griffith ei fod yn cymryd oddeutu 3 mlynedd i hyfforddi pobl ac mae gan fusnesau megis Rolls-Royce eu rhaglenni hyfforddi eu hunain.

·         Gofynnwyd cwestiynau ynghylch faint o fyfyrwyr sy’n astudio Peirianneg Forwrol a Thechnoleg Forwrol.  Dywedodd Mr Jones-Griffith y byddai’n darparu’r wybodaeth i Aelodau’n fuan.  Gofynnwyd cwestiynau pellach ynghylch cludo myfyrwyr i ddilyn cyrsiau ar gampws Grŵp Llandrillo Menai. Dywedodd Mr Jones-Griffith bod cludiant ôl-16 ar gael i fyfyrwyr fynychu cyrsiau.  Dywedodd fod Llywodraeth Cymru wedi cyhoeddi y gall pobl ifanc rhwng 16 a 21 oed deithio am £1 bob ffordd ledled Cymru er mwyn mynychu cyrsiau coleg o fis Medi 2025 ymlaen.    

Diolchodd y Cadeirydd i Mr Alwed Jones-Griffith, Prif Weithredwr Grŵp Llandrillo Menai am fynychu’r cyfarfod.

PENDERFYNWYD nodi’r sylwadau a dderbyniwyd yn ystod y drafodaeth.