Eitem Rhaglen

Cyflwyno adroddiad y Pennaeth Digidol, Perfformiad a Moderneiddio.                     

Cyflwynwyd adroddiad y Pennaeth Digidol, Perfformiad a Moderneiddio a oedd yn cynnwys Cerdyn Sgorio Corfforaethol ar gyfer Chwarter 4 2025/26 i'w ystyried gan y Pwyllgor Gwaith. Mae'r adroddiad yn cyflwyno perfformiad y Cyngor yn erbyn amcanion strategol Cynllun y Cyngor 2023-28 ar ddiwedd y pedwerydd chwarter.

Cyflwynodd y Cynghorydd Robin Williams, Dirprwy Arweinydd ac Aelod Portffolio Cyllid, Busnes Corfforaethol a Phrofiad Cwsmeriaid adroddiad y cerdyn sgorio gan nodi bod mwyafrif y dangosyddion (87%) gyda thargedau penodol wedi perfformio'n dda yn ystod y chwarter, gan gyflawni statws RAG Gwyrdd neu Felyn. Mae perfformiad blwyddyn ar ôl blwyddyn ar gyfer yr holl ddangosyddion tebyg (cyfanswm o 48) yn dangos bod 20 (42%) wedi gwella yn ystod y flwyddyn, bod 24 (50%) wedi gostwng a 4 (8%) wedi aros yr un fath. O'r 24 sy’n dangos gostyngiad, mae 62% yn dal i fod yn uwch neu o fewn 5% i'r targed, roedd 21% yn Ambr/Coch ac nid oedd gan 17% unrhyw dargedau wedi'u neilltuo iddynt.

Mae'r adroddiad yn tynnu sylw at nifer o lwyddiannau yn ystod y flwyddyn gan gynnwys cynnydd mewn gweithgarwch yn y Gymraeg, mwy o ddefnydd o Daliadau Uniongyrchol, cyfranogiad uchel yng ngweithgareddau Môn Actif, gwell lefelau Neet, boddhad uchel â'r gwasanaeth llyfrgell, cwblhau gwaith atgyweirio tai yn amserol, cwblhau arolygiadau hylendid bwyd risg uchel, penderfynu ar geisiadau cynllunio mewn pryd ac amodau ffyrdd da.

Fodd bynnag, mae wyth dangosydd yn dal i fod yn Goch neu'n Ambr yn erbyn targedau. Mae'r rhain yn ymwneud ag ail-atgyfeirio plant o fewn 12 mis; amseroedd ailosod tai, yr amser a gymerir i niferoedd contractau angori; ailgylchu gwastraff domestig ac amseroedd ymateb FOI.

Nododd fod adroddiad cerdyn sgorio Chwarter 4 wedi'i adolygu'n fanwl gan y Pwyllgor Sgriwtini Corfforaethol yn ei gyfarfod ar 10 Mehefin, lle heriwyd meysydd sy'n tanberfformio mewn trafodaeth gynhwysfawr a cheisiwyd sicrwydd ynghylch camau lliniaru. Cadarnhaodd y bydd y Tîm Arweinyddiaeth yn parhau i ganolbwyntio ar wella perfformiad yn y meysydd sydd ar hyn o bryd yn is na'r targed.

Adroddodd y Cynghorydd Jeff Evans, Cadeirydd y Pwyllgor Sgriwtini Corfforaethol, yn ôl o gyfarfod y pwyllgor ar 10 Mehefin 2026, lle ystyriwyd adroddiad cerdyn sgorio Ch4. Nododd, yn ystod y drafodaeth, fod aelodau wedi rhoi sylw arbennig i'r wyth dangosydd sy'n perfformio islaw'r targed ac i unrhyw symudiad niweidiol o ran tueddiadau. Ceisiodd yr Aelodau hefyd sicrwydd ynghylch y risgiau a'r effeithiau sy'n gysylltiedig â dangosyddion sy'n tanberfformio, y mesurau sydd ar waith i'w rheoli, a'r cynlluniau ar gyfer gwella yn y dyfodol. Ar ôl derbyn sicrwydd ar y materion hyn, penderfynodd y pwyllgor argymell yr adroddiad ynghyd â'r mesurau lliniaru a nodir ynddo, i'r Pwyllgor Gwaith.

Ymatebodd aelodau’r Pwyllgor Gwaith i'r pedwerydd cerdyn sgorio a'r olaf ar gyfer blwyddyn ariannol 2025/26 a darparwyd y sicrwydd canlynol -

Esboniodd y Cynghorydd Dyfed Wyn Jones, Aelod Portffolio Plant, Pobl Ifanc a Theuluoedd mewn perthynas ag atgyfeiriadau plant fod ail atgyfeiriad weithiau'n briodol. Mae'r gwasanaeth yn adolygu pob ail asesiad i ddeall y rhesymau drostynt, gan bwysleisio nad yw'r prif ffigur bob amser yn adlewyrchu'r esboniad a'r amgylchiadau y tu ôl i'r perfformiad.

Dywedodd y Cynghorydd Alun Roberts, Aelod Portffolio Hamdden, Twristiaeth, Morwrol ac Eiddo, er ei bod yn naturiol canolbwyntio ar feysydd sy’n tanberfformio, ei bod yn bwysig peidio â cholli golwg ar y mwyafrif o ddangosyddion sy'n cyrraedd neu'n rhagori ar eu targedau. Tynnodd sylw at Môn Actif fel enghraifft - cefnogwyd 4,000 o blant a phobl ifanc mewn gweithgareddau ar draws yr ynys yn ystod wythnos hanner tymor mis Mai.

Dywedodd y Cynghorydd Nicola Roberts, Aelod Portffolio Cynllunio a Gwarchod y Cyhoedd fod perfformiad gorfodaeth gynllunio wedi symud o Wyrdd i Felyn. Esboniodd fod canran yr achosion gorfodaeth wedi cynyddu tra bod maint y tîm gorfodaeth wedi aros yr un fath, a bod camau'n cael eu cymryd i fynd i'r afael â'r sefyllfa a chodi perfformiad yn ôl i'r targed. Roedd hi'n falch o gadarnhau bod archwiliadau bwyd busnesau risg uchel wedi’u cwblhau’n llawn, a hynny gan dîm bach sydd wedi dangos gwytnwch yn ystod cyfnod heriol.

Cadarnhaodd y Cynghorydd Dafydd Roberts, Aelod Portffolio dros Addysg a'r Gymraeg y bydd grŵp llywio'r Gymraeg a Chydraddoldeb yn adolygu perfformiad DP y Gymraeg, gan ganolbwyntio'n benodol ar y dangosyddion hynny lle mae'r ar duedd i lawr.

Esboniodd y Cynghorydd Carwyn Jones, Portffolio Tai a Diogelwch Cymunedol mai’r rheswm dros yr oedi wrth ddarparu cartrefi cyngor newydd oedd cymhlethdodau ar y safle mewn dau ddatblygiad, a oedd y tu hwnt i reolaeth y Cyngor. Tynnodd sylw at y gwelliant cyson mewn amser ailosod tai gwag dros y flwyddyn ar ôl cyflwyno prosesau newydd, yn ogystal â nifer yr eiddo a ddaeth yn ôl i ddefnydd, a oedd yn rhagori ar y targed yn Ch4. Cyfeiriodd hefyd at gyfraniad y Cyngor mewn prosiectau o dan Gynllun Prydlesu Cymru oedd yn anelu at ddod ag eiddo ac adeiladau gwag yn ôl i ddefnydd.

Adroddodd y Cynghorydd Neville Evans, Aelod Portffolio Gwasanaethau Oedolion fod yr holl ddangosyddion gwasanaethau oedolion wedi cael sgôr gwyrdd ac yn unol â’r targed.

Croesawodd aelodau’r Pwyllgor Gwaith y perfformiad cryf ar draws y mwyafrif o'r dangosyddion a diolchodd i staff ar draws yr holl wasanaethau am eu gwaith caled a'u hymrwymiad ar hyd y flwyddyn sy'n sail i'r canlyniadau cadarnhaol a adroddwyd. Fe wnaethant hefyd gydnabod y meysydd sy'n tanberfformio a amlygwyd yn y cerdyn sgorio a chadarnhawyd y bydd mesurau yn parhau i gael eu gweithredu i sicrhau cynnydd pellach.

Penderfynwyd derbyn adroddiad monitro’r cerdyn sgorio ar gyfer Chwarter 4 2025/26 a nodi’r meysydd y mae’r Tîm Arweinyddiaeth yn eu harchwilio ac yn ymchwilio iddynt er mwyn rheoli a sicrhau gwelliant pellach yn y dyfodol. Roedd y meysydd hyn yn ymwneud â Gofal Cymdeithasol a Llesiant (ail-gyfeirio plant o fewn 12 mis); Tai (ail-osod eiddo gwag, gwireddu Grantiau Cyfleusterau i’r Anabl – addasiadau canolig a mawr, a datblygu tai Cyngor newydd); yr Economi (nifer y contractau angori blynyddol); Newid Hinsawdd (ailgylchu gwastraff o’r cartref) ac Iechyd Cyngor Cyfan (ymateb i geisiadau Rhyddid Gwybodaeth yn unol â’r amserlen).