Eitem Rhaglen

Cais am ganiatâd arbennig.

Dywedodd y Cyfarwyddwr Swyddogaeth (Busnes y Cyngor)/Swyddog Monitro fod y Cynghorydd Celfyn Furlong wedi ceisio caniatâd arbennig yn seiliedig ar ei ddiddordeb rhagfarnol mewn perthynas â’r busnes, sy’n gweithredu safle carafanau 44 llain.     

Nodwyd fod y Cyngor Sir yn cynnal ymgynghoriad ar y cynnig i fabwysiadu ardoll ymwelwyr a’i peidio, yn unol â Deddf Llety Ymwelwyr (Cofrestr ac Ardoll) Etc. (Cymru) 2025. 

Mae’r Cynghorydd Furlong wedi gwneud cais am ganiatâd arbennig i allu cymryd rhan mewn cyfarfodydd neu drafodaethau am yr ardoll yn y dyfodol, ac i ysgrifennu at swyddogion ac aelodau am y mater.  Mae wedi gofyn am ganiatâd i fynychu a chymryd rhan mewn cyfarfodydd yn ystod unrhyw drafodaeth neu bleidlais ar yr ardoll, ond nid yw’n dymuno pleidleisio ei hun.

Gwahoddodd y Cadeirydd y Cynghorydd Furlong i siarad o blaid ei gais.  

Dywedodd y Cynghorydd Furlong fod ganddo arbenigedd a phrofiad sylweddol o weithio yn y diwydiant twristiaeth a’i fod eisiau codi ymwybyddiaeth aelodau etholedig, y cyhoedd a pherchnogion busnes o’r goblygiadau ynghlwm â mabwysiadu’r ardoll ymwelwyr.  Ategodd mai ei fwriad yw cynrychioli’r sector, gofyn cwestiynau a defnyddio ei wybodaeth a’r brofiad yn y maes. 

Cafodd aelodau’r Panel gyfle i gwestiynu Cynghorydd Furlong ar sawl agwedd ar ei waith, yn cynnwys sut fyddai’r ardoll yn effeithio ar ei fusnes pe byddai’n cael ei fabwysiadu. 

Dywedodd y Cynghorydd Furlong ei fod yn gweithredu ac yn berchen ar safle carafanau teithio sy’n croesawu carafanau teithio, cartrefi modur, pebyll a lleiniau tymhorol.  Dywedodd y byddai ffi yr ardoll ymwelwyr ar gyfer cartrefi modur a charafanau yn cael ei osod ar gyfradd uwch, gyda phebyll ar gyfradd is, a lleiniau tymhorol yn cael eu heithrio oni bai eu bod yn cael eu his-osod.  Pwysleisiodd y byddai rheoli’r ardoll yn creu mwy o lwyth gwaith iddo, gan y byddai ffioedd yn weithredol pan mae ymwelwyr yn gadael y safle carafanau.  Nodwyd y gallai hyn achosi problemau pe byddai ymwelwyr yn penderfynu gadael safleoedd carafanau heb dalu’r ffioedd.

Pwysleisiodd y Cynghorydd Furlong y byddai rheoli ochr weinyddol yr ardoll ymwelwyr yn creu baich i berchnogion gwersyllfeydd gan nad yw bob gwersyllfa wedi mabwysiadu’r dechnoleg ddiweddaraf.  Nodwyd y bydd rhaid i’r rheiny sy’n rhedeg gwersyllfeydd gydymffurfio gyda rheoliadau Awdurdod Cyllid Cymru a chyflwyno adroddiadau chwarterol i’r Awdurdod hwnnw.

Dywedodd y Rheolwr Economi Ymwelwyr ac Ardaloedd Arfordirol y bydd angen glynu wrth ganllawiau Llywodraeth Cymru dros y misoedd nesaf o ran yr ardoll ymwelwyr.  Eglurodd fod y Cyngor Sir yn cynnal ymgynghoriad agored am 8 wythnos ar hyn o bryd sy’n darparu digon o wybodaeth i alluogi pobl i ymateb yn bwyllog iddo, sy’n cynnwys asesiad o’r economi, cydraddoldeb a’r amgylchedd.  Bydd ymgynghorydd annibynnol yn cael ei benodi i gyflwyno adroddiad terfynol i’r Cyngor llawn yn dilyn dadansoddiad o adborth yr ymgynghoriad.

Ar ôl gwrando ar gefndir y cais am ganiatâd arbennig gan yr Ymgeisydd, aeth y Panel ati i gynnal sesiwn breifat i benderfynu a ddylid rhoi caniatâd arbennig ai peidio, ac os rhoddir ganiatâd arbennig, rhaid ystyried (i) ar ba sail neu seiliau y rhoddir y caniatâd arbennig ac (ii) a fydd unrhyw gyfyngiadau’n cael eu cyflwyno.

PENDERFYNWYD rhoi’r caniatâd arbennig i’r Cynghorydd Furlong yn ei rinwedd fel Cynghorydd Sir mewn perthynas â’r diddordebau hynny y

cyfeiriwyd atynt yn y cais ac ar y ddwy sail sydd wedi’u hamlygu yn y cais.

Mae’r caniatâd arbennig hwn yn rhoi hawl i’r Cynghorydd: -

•  ysgrifennu at swyddogion ac aelodau am y mater;

•  siarad gyda swyddogion am y mater, cyn belled a bo nodyn o drafodaethau

   o’r fath yn cael ei chadw;

•  siarad ym mhob cyfarfod am y mater;

•  aros yn yr ystafell yn ystod unrhyw drafodaeth am y mater a thra bo’r

   bleidlais yn cael ei bwrw, ond ni chaiff gymryd rhan yn y

   bleidlais.  

Cyfyngiadau:

•  Ni chaniateir iddo bleidleisio.

•  Bydd y caniatâd arbennig yn dod i ben ar ddiwedd y tymor cyfredol ar gyfer

   aelodau etholedig y Cyngor Sir (ar y pedwerydd diwrnod

   ar ôl yr etholiad llywodraeth leol nesaf).

Camau:

•  Rhaid i’r Cynghorydd Furlong ddatgan diddordeb rhagfarnol wrth fynychu

   cyfarfodydd y Cyngor, a’r holl gyfarfodydd perthnasol  eraill.

•  Cytunodd y Swyddog Monitro a’r Cadeirydd ar eiriad priodol ar gyfer yr

   Hysbysiad o Benderfyniad, a

•  Bydd y Cadeirydd yn ysgrifennu at y Cynghorydd Furlong yn cadarnhau fod

   y Panel Caniatâd Arbennig wedi rhoi’r caniatâd.

•  Bydd copi o’r Hysbysiad o Benderfyniad yn cael ei rannu gyda’r

   Cynghorydd Furlong, Llywodraeth Cymru a’r Gwasanaethau

   Democrataidd.