Eitem Rhaglen

7.1 -14C164D – Tryfan, Trefor

7.2 - 19LPA434B/FR/CC – Canolfan Gymuned Jesse Hughes, Caergybi

7.3 - 36C328A – Bodafon, Llangristiolus

7.1  14C164D - Cais amlinellol gyda rhai materion wedi eu cadw'n ôl ar gyfer codi pâr o anheddau un talcen a chreu mynedfa i gerbydau ar dir ger Tryfan, Trefor

Roedd y cais yn cael ei gyflwyno i’r Pwyllgor Cynllunio a Gorchmynion oherwydd bod yr ymgeisydd yn gyfaill i swyddog 'perthnasol' fel a ddiffinnir ym mharagraff 4.6.10.2 y Cyfansoddiad.  Roedd y Pwyllgor Cynllunio a Gorchmynion yn ei gyfarfod ar 30 Gorffennaf, 2014 wedi penderfynu gwrthod y cais a hynny’n groes i argymhelliad y Swyddog ar y sail nad oedd yr angen am dai ym mhentref Trefor wedi ei brofi.

Gwahoddodd y Cadeirydd y Cynghorydd Bob Parry OBE, un o'r Aelodau Lleol i annerch y cyfarfod.  Dywedodd y Cynghorydd Parry fod caniatâd cynllunio eisoes yn bodoli ar y safle am un annedd ond bod yr ymgeisydd yn dymuno rhoi cyfle i brynwyr tro cyntaf yn lleol allu prynu eu cartref eu hunain.  Dywedodd ymhellach mai’r unig sylw yr oedd preswylwyr Tryfan yn dymuno ei wneud yw - pan gyflwynir y cynllun manwl na fydd ffenestri’r anheddau yn edrych dros eu heiddo.

Dywedodd y Cynghorydd T. Victor Hughes ei fod wedi pleidleisio yn erbyn y cais yn y cyfarfod diwethaf ond yn dilyn ystyried y cyfle oedd yma i bobl ifanc allu fforddio i brynu anheddau o'r fath yn hytrach nag un tŷ mawr fyddai y tu hwnt i’w cyrraedd, roedd yn fodlon cefnogi'r cais.  Fodd bynnag, dywedodd y dylid rhoi sylw dyledus i’r angen i gael tanc septig mawr ar gyfer y ddwy annedd ac y dylid gwneud contract fyddai’n ymrwymo perchenogion yr eiddo i gynnal a chadw’r system ddraenio.

Dywedodd y Rheolwr Rheoli Datblygu fod yr ymgeisydd wedi cyflwyno tystiolaeth gan ddau werthwr tai ar wahân yn dweud bod angen am eiddo o’r fath yn yr ardal.  Roedd Galluogydd Tai Gwledig y Cyngor o’r farn y bydd diddordeb yn yr ardal am ddatblygiad o'r fath oherwydd agosrwydd Trefor i bentrefi eraill yn yr ardal.  Roedd yr Asesiad o’r Farchnad Lleol Ynys Môn yn dweud bod angen am 134 o dai o’r  dyluniad hwn bob blwyddyn am y 5 mlynedd nesaf.  Mae dros 1,500 o bobl ar hyn o bryd ar y rhestr aros am dai gyda’r Cyngor Sir a dros 500 o bobl wedi cofrestru gyda sefydliad Tai Teg.  Mae’n glir bod angen amlwg ar yr Ynys a hefyd yn yr ardal hon, am y math hwn o dai.

Dywedodd y Rheolwr Rheoli Datblygu ymhellach bod llythyr wedi ei dderbyn yn hwyr gan yr ymgeisydd a darllenodd allan brif bwyntiau’r llythyr.

Dywedodd y Cynghorydd Ann Griffith nad oedd yn credu bod yna alw mawr am dai o’r fath yn Trefor a chynigiodd y dylid gwrthod y cais.  Nid chafwyd eilydd i'w chynnig.

Cynigiodd y Cynghorydd K.P. Hughes y dylid caniatáu’r cais ac eiliodd y Cynghorydd R O Jones y cynnig.

PENDERFYNWYD cymeradwyo’r cais yn unol ag argymhelliad y Swyddog, a chyda’r amodau oedd wedi eu rhestru yn yr adroddiad ysgrifenedig.

7.2  9LPA434B/FR/CC - Cais llawn ar gyfer adnewyddu'r adeiladau gwreiddiol, dymchwel yr estyniad cyswllt ynghyd â chodi estyniad deulawr newydd yng Nganolfan Cymuned Jesse Hughes, Caergybi

(Datganodd y Cynghorydd Jeff Evans ddiddordeb yn y cais hwn a gadawodd y cyfarfod yn ystod y drafodaeth a’r pleidleisio arno).

Cyflwynwyd y cais i'r Pwyllgor Cynllunio a Gorchmynion oherwydd mai cais gan y Cyngor ydoedd ar dir y Cyngor.  Yn y cyfarfod a gynhaliwyd ar 2 Gorffennaf 2014 fe benderfynodd y Pwyllgor ohirio'r cais oherwydd i ymgynghori ddigwydd gyda’r aelodau lleol anghywir.  Roedd y camgymeriad hwn wedi ei gywiro.  Yn y cyfarfod a gynhaliwyd ar 30 Gorffennaf 2014 fe benderfynwyd ymweld â'r safle.  Fe wnaed hynny ar 20 Awst 2014.

Dywedodd y Rheolwr Rheoli Datblygu bod y prif bryderon i’w gweld fel pe baent yn ymwneud ag isadeiledd priffyrdd yn yr ardal.  Dywedodd bod gwaith ymgynghori pellach wedi ei wneud gyda’r ymgeisydd a'r Awdurdod Priffyrdd a chytunwyd y byddai Cynllun Rheoli Traffig yn cael ei roi yn ei le yn ystod y cyfnod adeiladu.  Bydd angn cynllun hefyd pan fydd y cyfleuster ar agor.  Bydd amod cynllunio yn cael ei osod ar y caniatad fel oedd wedi ei nodi yn yr adroddiad.

Gwahoddodd y Cadeirydd y Cynghorydd T.Ll Hughes, Aelod Lleol i annerch y cyfarfod.  Dywedodd y Cynghorydd Hughes nad oedd ganddo unrhyw wrthwynebiad i'r cais ond mai’r rheswm yr oedd wedi galw’r cais i mewn i'w benderfynu gan y Pwyllgor oedd bod ganddo bryderon ynglŷn â mater y traffig yn yr ardal.

Dywedodd yr Uwch Beiriannydd (Rheoli Datblygu), fel rhan o'r broses o ddatblygu’r Cynllun Rheoli Traffig, fod trafodaethau wedi eu cynnal gyda pherchennog y garej gerllaw.  Roedd cytundeb llafar wedi ei sicrhau y byddai’r tir y tu ôl i’r garej yn cael ei ddefnyddio fel mynedfa dros dro ar gyfer danfon deunyddiau adeiladu yn ystod y cyfnod adeiladu.  Roedd cytundeb cyfreithiol yn y broses o gael ei gwblhau i’r perwyl hwn.

Cynigiodd y Cynghorydd K.P. Hughes y dylid caniatáu’r cais ac eiliodd y Cynghorydd Lewis Davies y cynnig.

PENDERFYNWYD cymeradwyo’r cais yn unol ag argymhelliad y Swyddog, a chyda’r amodau oedd wedi eu rhestru yn yr adroddiad ysgrifenedig.

7.3  36C328A - Cais amlinellol gyda rhai materion wedi eu cadw yn ôl ar gyfer codi annedd a chreu mynedfa newydd ynghyd â dymchwel y garej bresennol ar dir ger Bodafon, Llangristiolus

Roedd y cais wedi ei gyflwyno i’r Pwyllgor Cynllunio a Gorchmynion ar ofyn Aelod Lleol.  Roedd yr Aelodau wedi ymweld â’r safle ar 17 Gorffennaf 2014.

Dywedodd y Rheolwr Rheoli Datblygu bod y Pwyllgor Cynllunio a Gorchmynion a gynhaliwyd ar 30 Gorffennaf 2014 wedi penderfynu gwrthod y cais a hynny yn groes i argymhelliad y Swyddog oherwydd y byddai’n cyfateb i or-ddatblygu yn y cefn gwlad ac nad oedd yn cydymffurfio â Pholisi 50 Cynllun Lleol Ynys Môn oherwydd ei bellter o'r ffin ddatblygu.  Dywedodd bod llythyrau ychwanegol wedi eu derbyn gan yr ymgeisydd a'i asiant a’u bod yn y pecyn oedd ar gael i’r Pwyllgor o fewn y cyfnod amser.  Cyfeiriodd y Swyddog at yr adroddiad gerbron y cyfarfod oedd yn dweud bod y safle yn mesur bron i 1,000 metr sgwâr a’i fod yn cael ei ystyried yn faint digonol ar gyfer annedd.  Roedd y safle yn union gyfagos i’r eiddo a elwir yn Bodafon ac roedd o fewn clwstwr o 7 annedd, ac felly ystyriwyd ei fod yn estyniad derbyniol i’r pentref ac na fyddai'n cyfateb i or-ddatblygu yn y cefn gwlad.

Gan siarad fel Aelod Lleol dywedodd y Cynghorydd T. Victor Hughes bod Aelodau'r Pwyllgor hwn wedi derbyn 2 lythyr gan yr ymgeisydd yn cadarnhau mai ail gartref oedd Bodafon a bod y perchennog yn gobeithio cadw ac uwchraddio’r eiddo hwnnw drwy werthu’r cais hwn yn y man pe câi caniatâd ei roi.  Darllenodd y Cynghorydd Hughes ddyfyniad o’r llythyr a dderbyniwyd dyddiedig 9 Awst 2014.  Roedd y ffordd sy’n arwain i’r safle yn eithriadol o gul heb unrhyw balmant.  Mae Polisi 23 yn dweud y bydd ‘datblygiad lle mae’r ddarpariaeth o gludiant cyhoeddus yn wael, yn cael ei wrthod’.  Mae Polisi 48 yn cyfeirio at anghenion a lles yr Iaith Gymraeg a dywed Cynllun Fframwaith Gwynedd A3 'er budd yr Iaith Gymraeg... ac argaeledd cyfleusterau cymdeithasol a chymunedol'.  Roedd am gwestiynu lle'r oedd y cyfleusterau hyn yng nghymuned Llangristiolus?  Mae Polisi 1 Cynllun Lleol Ynys Môn yn cyfeirio at anghenion a lles yr Iaith Gymraeg.  Holodd pa bryd yr oedd yr awdurdod yn mynd i gymryd sylw digonol o'r polisïau hyn?  A yw caniatáu datblygiad marchnad agored arall i ymgeisydd nad yw wedi profi bod unrhyw angen amdano?  Roedd o'r farn nad oedd caniatáu datblygiad i ariannu ail gartref yn rheswm digonol i adeiladu annedd mewn safle tir gwyrdd mewn ardal wledig.  Am y rhesymau hyn, cynigiodd y dylai’r Pwyllgor wrthod y cais.  Eiliwyd y cynnig gan y Cynghorydd R.O. Jones.

Cynigiodd y Cynghorydd K.P. Hughes y dylid caniatáu’r cais ac eiliwyd hynny gan y Cynghorydd Nicola Roberts.

PENDERFYNWYD cymeradwyo’r cais yn unol ag argymhelliad y Swyddog, a chyda’r amodau oedd wedi eu rhestru yn yr adroddiad ysgrifenedig.