Eitem Rhaglen

·           Cymdeithas Gemau’r Ynysoedd Ynys Môn

Derbyn cyflwyniad a chais gan Gymdeithas Gemau’r Ynysoedd Ynys Môn. 

·           Bwrdd Prosiect Camerâu Goruchwylio’r Pum Tref

Derbyn cyflwyniad a chais gan Bwrdd Proseict Camerâu Goruchwylio’r Pum Tref.

·               Cymdeithas Gemau’r Ynysoedd Ynys Môn

            Croesawodd y Cadeirydd gynrychiolwyr o Gymdeithas Gemau’r Ynysoedd Ynys Môn i roi cyflwyniad yng nghyswllt cais am gymorth grant gan Ymddiriedolaeth Elusennol Ynys Môn.

Rhoddodd y cynrychiolwyr grynodeb o weithgareddau Cymdeithas Gemau’r Ynysoedd Ynys Môn gan adrodd am lwyddiant nifer o athletwyr sydd wedi cynrychioli Ynys Môn yng Ngemau’r Ynysoedd dros y blynyddoedd.

Roedd y fid am gymorth  grant yn un am brosiect 5 mlynedd fel a ganlyn:-

Blwyddyn 1                     -          £50,000  (Bydd £10k tuag at Gystadleuaeth Gymnasteg Rhyng-Gemau 2015)

Blynyddoedd 2 i 5           -           £40,000 y flwyddyn

Nodwyd y byddai bid lwyddiannus yn sicrhau dyfodol Gemau’r Ynysoedd dros y 5 mlynedd nesaf.

Roedd y rhesymau am y fid am gymorth grant fel a ganlyn:-

·         roedd y cais yn cael ei wneud er mwyn gwella perfformiad;

·         i gynyddu cynrychiolaeth;

·         i gynyddu ymwybyddiaeth yn lleol;

·         i ymestyn yr iaith a diwylliant;

·         sicrwydd ariannol i Gymdeithas Gemau’r Ynysoedd Ynys Môn;

·         sicrhau cynrychiolaeth Ynys Môn;

·         i ddatblygu athletwyr;

·         i ddatblygu hyfforddwyr a swyddogion;

Dywedwyd hefyd y bydd Ynys Môn yn Lletya’r gystadleuaeth Gymnasteg Rhyng-Gemau 2015 gyda 8 Ynys yn cystadlu.   Bydd y gystadleuaeth yn cael ei chynnal yng Nghaergybi dros 5 diwrnod.

I ddilyn, cafwyd sesiwn o gwestiynau ac atebion gan Aelodau Ymddiriedolaeth Elusennol Ynys Môn i’r cynrychiolwyr o Gymdeithas Gemau’r Ynysoedd Ynys Môn a thrafodwyd y materion a ganlyn:-

·         cefnogaeth unfrydol i Gymdeithas Gemau’r Ynysoedd Ynys Môn ac estynnwyd canmoliaeth uchel i’r athletwyr ar eu llwyddiant yng Ngemau’r Ynysoedd.;

·         dylai cynllun busnes a mantolen ariannol fod wedi eu hatodi i’r cais am gymorth grant;

·         dylid rhoi manylion ynglŷn â gweinyddwyr Cymdeithas Gemau’r Ynysoedd Ynys Môn.

·         dylai pob plentyn a pherson ifanc gael y cyfle i ragori mewn gweithgareddau chwaraeon;

PENDERFYNWYD yn unfrydol:-

·         I gymeradwyo’r cais am gyllid a wnaed gan Gymdeithas Gemau’r Ynysoedd Ynys Môn am £50k yn y flwyddyn gyntaf a £40k wedi hynny am y 4 blynedd ddilynol;

·         Y dylai Cymdeithas Gemau’r Ynysoedd Ynys Môn roi manylion am weinyddwyr y Gymdeithas i Ymddiriedolaeth Elusennol Ynys Môn;

·         Bod mantolen ariannol a Chynllun Busnes llawn Cymdeithas Gemau’r Ynysoedd Ynys Môn yn cael eu cyflwyno i Ymddiriedolaeth Elusennol Ynys Môn cyn rhyddhau’r cyllid grant.

·         Bwrdd Prosiect Camerâu Diogelwch y Pum Tref

Rhoddodd y Cadeirydd groeso i Mr Cliff Everett, Clerc Cyngor Tref Caergybi fel cynrychiolydd Bwrdd Prosiect Camerâu Diogelwch y Pum Tref a’r Arolygydd Guy Blackwell, Heddlu Gogledd Cymru i roi cyflwyniad yn gysylltiedig â chais am gymorth grant gan Ymddiriedolaeth Elusennol Ynys Môn.

Dywedodd Mr Everett mai ymgyrch oedd y prosiect hwn ar ran y 5 Cyngor tref i weithio mewn partneriaeth i fabwysiadu a rheoli gwasanaeth Camerâu Diogelwch newydd am y 10 mlynedd nesaf gyda golwg ar gael trafodaeth bellach gyda datblygwyr mawr am eu cyfraniad tuag at wella diogelwch y cyhoedd ar Ynys Môn.  Bydd pob Cyngor Tref yn cymryd cyfrifoldeb am eu cynllun eu hunain o ran y dyluniad cychwynnol, cynllunio, caffael, ardaloedd goruchwylio, cynnal a chadw ac anghenion monitro / mynediad.  Bydd Heddlu Gogledd Cymru a Phartneriaid Diogelwch Cymunedol yn parhau i weithio’n agos gyda phob un o’r Cynghorau Tref o dan nawdd Deddf Trosedd ac Anhrefn 1998.

Mae’r 5 Cyngor Tref wedi cael dyfynbrisiau ar gyfer cynnal a chadw eu systemau Camerâu Diogelwch ar gost o £20k y flwyddyn dros gyfnod ymrwymedig o 10 mlynedd.  Mae trafodaethau’n cael eu cynnal o fewn y 5 Cyngor Tref ynglŷn â rheolaeth y cynllun – a ddylai hynny fod o dan y strwythur presennol neu drwy gwmni cyfyngedig drwy warant.

Dywedodd Mr Everett mai cais oedd hwn am gyllid grant unwaith ac am byth o £195,000.

Dywedodd yr Arolygydd Guy Blackwell nad bwriad y cynllun hwn yw parhau i weithredu’r Camerâu Diogelwch blaenorol ond i weithredu system newydd gyda chefnogaeth Heddlu Gogledd Cymru.

Dywedodd yr Ysgrifennydd y cafwyd cyngor cyfreithiol gan Weightmans LLP yng nghyswllt y cais hwn ac fe hysbyswyd y cynrychiolwyr o Fwrdd Prosiect Camerâu Diogelwch y 5 Tref ynglŷn â’r ymateb a gafwyd gan Weightmans LLP ymlaen llaw.  Y Cyngor a gafwyd oedd bod angen cael gwahaniad clir rhwng darpariaeth y Cyngor o’r gwasanaeth Camerâu Diogelwch a sut y bydd y gwasanaeth yn cael ei ddarparu i’r dyfodol.  Dywedwyd ymhellach bod rhai anawsterau gyda’r cais hwn fel y mae’n cael ei gynnig ar hyn o bryd a hynny’n codi o ‘fudd anuniongyrchol’ o ystyried na chafwyd gwahaniad pendant.

I ddilyn cafwyd sesiwn o gwestiynau ac atebion gan Aelodau Ymddiriedolaeth Elusennol Ynys Môn i gynrychiolwyr Bwrdd Prosiect Camerâu Diogelwch y 5 Tref a chodwyd y materion a ganlyn:-

·         roedd Ymddiriedolaeth Elusennol Ynys Môn yn cefnogi’r cais mewn egwyddor;

·         bydd angen cael gwahaniad pendant rhwng darpariaeth y Cyngor Sir o Gamerâu Diogelwch er mwyn bodloni deddfwriaeth y Comisiwn Elusennol;

·         mae angen rhoi sicrwydd i breswylwyr yr Ynys bod Camerâu Diogelwch yn eu lle i atal ac i weithredu i stopio trosedd ac ymddygiad gwrthgymdeithasol;

Cynigiodd Mr. W.T. Hughes y dylid cymryd pleidlais wedi’i chofnodi.  Ni chariwyd y cynnig.

PENDERFYNWYD:-

·         cymeradwyo, mewn egwyddor, y cais am gyllid a wnaed gan Fwrdd Prosiect Camerâu Diogelwch 5 Tref, yn amodol ar gael sicrwydd bod ‘gwahaniad pendant’ yn cael ei nodi rhwng darpariaeth Camerâu Diogelwch y Cyngor Sir;

·         y bydd angen cynnal trafodaethau pellach gyda Bwrdd Prosiect Camerâu Diogelwch y 5 Tref a Swyddogion yr Ymddiriedolaeth Elusennol.